Уйғур аптоном райони даирилири американиң «уйғур кишилик һоқуқ қанун лайиһәси» гә давамлиқ һуҗум қилмақта

Мухбиримиз әркин
2019-12-10
Елхәт
Пикир
Share
Принт

Уйғур аптоном райони даирилириниң 3‏-декабир күни америка авам палатасида мақулланған «уйғур кишилик һоқуқ қанун лайиһәси» гә қарши һуҗуми кәң көләмлик давам қилмақта.

Даириләр илгири һәр дәриҗилик һөкүмәт әмәлдарлирини, диний өлималар вә зиялийларни мәзкур қанун лайиһәсигә қарши ипадә билдүрүшкә селип кәлгән. Буниңда ақсуниң валиси нияз һашим, қәшқәр валиси пәрһат рози, қәшқәр шәһириниң шәһәр башлиқи ясин яқуп, кәлпин, ташқорған, учтурпан наһийәлириниң һакими қатарлиқлар мақалә елан қилип, қанун лайиһәсигә қарши ипадә билдүргән. Лекин, хитай таратқулириниң хәвәр қилишичә, нөвәттә даириләр йәнә райондики завут карханиларда әмгәккә селиниватқан сабиқ лагер тутқунлириниму қанун лайиһәсигә қарши ишқа салмақта икән.

Қәшқәр кона шәһәр наһийәсиниң турғуни атигүл қари әнә шуларниң биридур. Атигүлниң ери алим рахман илгири лагерға елип кетилип, йеқинда кона шәһәр наһийәсидики бир карханиға мәҗбурий әмгәккә йөткәлгән. Атигүл қари 10‏-декабир «тәңритағ» торида мақалә елан қилип, «кәспий тәрбийәләш мәркәзлири» намидики лагерниң еридики «әсәбийлик идийәси» ни тазилап, уни «нормал адәм» гә айландурғанлиқини илгири сүргән. Хотән наһийәсидә олтурушлуқ әзиз турсун тохти хитай таратқулирида мақалә елан қилип, лагерларни ақлиған йәнә бир сабиқ лагер тутқуни. У 10‏-декабир «шинҗаң» гезитидә елан қилған мақалисидә, «тәрбийәләш мәркизигә киришиниң һаятидики бурулуш нуқтиси» икәнликини илгири сүргән. Лекин һазир хотән наһийәсидики бир аяқ завутида ишләватқан әзиз турсун тохти, өзиниң бурун немә иш қилидиғанлиқини чүшәндүрмигән. Уларниң бу мақалиләрни өз разилиқи яки заказ билән язғанлиқи мәлум әмәс. Лекин, бу мақалиләрниң мәзмуниниң һөкүмәт тәшвиқати билән охшаш икәнлики диққәт қозғимақта.

Пикирләр (0)
Share
Толуқ бәт