Қәшқәр даирилири партийә әзалири вә кадирлардин йүз миң кишини тәшкилләп, қәсәмяд йиғини өткүзгән

Қәшқәр даирилири партийә әзалири вә кадирлардин йүз миң кишини тәшкилләп, қәсәмяд йиғини өткүзгән

Даириләрниң уйғур елида аммини тәшкилләп “коллектип қәсәмяд йиғини” уюштуруш вә уйғурларни асас қилған йәрлик милләт кадирлириға “очуқ хәт”елан қилдуруш долқуниниң рамизан мәзгилидә йәниму юқири пәллигә көтүрүлгәнлики мәлум болмақта.

Тәңритағ ториниң хәвиригә қариғанда, қәшқәр вилайәтлик даириләр 27-май күни чүштин кейин қәшқәр шәһиридики хәлқ мәйданиға 100 миң кишилик партийә әзаси билән һәр дәриҗилик кадирларни топлап, “қәсәмяд йиғини” өткүзгән.

Хәвәрдә дейилишичә, қәшқәр вилайәтлик парткомниң риясәтчиликидә өткүзүлгән бу қетимлиқ зор көләмлик “қәсәмяд йиғини” да партийә әзалири билән кадирлар бирдәк аталмиш “үч хил күч” билән “икки йүзлимичи” ләргә қарши мурәссәсиз җәң елип баридиғанлиқи һәққидә қәсәм бәргән.

Хәвәрдә йәнә, қәшқәр шәһириниң хәлқ мәйданиға топланған йүз миң партийә әзаси билән һәр дәриҗилик кадирниң қәшқәр вилайәтлик интизам тәкшүрүш комитетиниң секретари ясин сидиқниң риясәтчиликидә шоар товлап қәсәм бәргәнлики вә бир-бирләп имза қойғанлиқи тилған елинған.

Игилинишичә, қәшқәрдә өткүзүлгән бу қетимлиқ йүз миң кишилик “қәсәмяд йиғини” рамизан киргәндин буян пүткүл уйғур диярида уюштурулған әң зор көләмлик сиясий ипадә билдүрүш паалийити икән. Көзәткүчиләр, чен чүәнго уйғур диярини идарә қилған йерим йилдин артуқ вақит җәрянда райондики сиясий атмосфераниң “мәдәнийәт инқилаби” дәвридинму ешип кәткәнликини тәкитлимәктә.