Uyghur-xitay ikki millettin toylashqan a'ililer xitay hökümet taratqulirining teshwiqat obyéktigha aylanmaqtiken

Muxbirimiz qutlan
2016-12-19
Share

Igilinishiche, xitay hökümet taratquliri Uyghur-xitay ikki millettin toylashqan a'ililerni bes-beste teshwiq qilishqa bashlighan.

Tengritagh torining bügünki xewirige qarighanda, jenubiy shinjang herbiy rayonining xotende turushluq melum polkidiki bir xitay rota komandiri bilen xoten wilayetlik j x idarisining saqchisi gülistanning toy qilip "Ülgilik a'ile" qurghanliqi alahide teshwiq qilin'ghan.

Xewerde déyilishiche, 2012-yili ular ikkisi toy qilghandin buyan xitayning armiye, saqchi sistémisi we hökümet tereptin köp qétim "Ilghar a'ile" bolup bahalinip mukapatlan'ghan. Toydin kéyin ismini dey na dégen xitayche isimgha özgertken gülistan jenubiy shinjang herbiy rayoni teripidin "10 Munewwer herbiy yengge" ning biri dep nam bérilgen. Yéqinda ularning a'ilisige yene xitay boyiche "Birinchi nöwetlik memliketlik medeniyetlik a'ile" dégen nam bérilgenliki melum.

Közetküchiler, xitay hökümiti bilen armiye-saqchi sistémisining yéqindin buyan Uyghur élidiki milletlerning öz-ara qoshulup kétishini yaki millet halqighan toylishishni küchep teshebbus qiliwatqanliqini, hetta bu xil a'ililerni siyasiy we iqtisadiy jehettin righbetlendürüwatqanliqini ilgiri sürmekte.

Chet'ellerdiki Uyghur siyasiy analizchilar, chén chwen'go Uyghur aptonom rayonigha partkom sékrétari bolup kelgendin buyan atalmish "Qoshmaq tughqan siyasiti" ni küchep yolgha qoyup, rayondiki Uyghurlar bilen xitaylarning munasiwitini yumshitishqa, hetta ularni tughqanlashturup milliy we diniy perqlerni yoq qilishqa urunuwatqanliqini agahlandurmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.