Бу йилму уйғур районида чаған байрими өткүзүш шамили күчийип кәткән

Мухбиримиз җәвлан
2021-02-12
Share

Хитай таратқулириниң бәс-бәстә таратқан хәвәрлиригә қариғанда, бүгүнму уйғур районида чаған байрими өткүзүш шамили әвҗ алдурулған болуп, шәһәрдин йезиларғичә, коча-койлардин мәһәллиләргичә бу байрамни өткүзүш уйғурларниң "вәтәнни сөйүш, җуңхуа миллити әнәнисигә варислиқ қилиш" мәйданини синайдиған муһим паалийәт болуп қалған.

9-Феврал тарқалған сүрәтлик хәвәрләрдә қәшқәр қәдимий шәһәр районидики аһалиләрниң чаған келиши һарписида өйлириниң алдиға хитайчә мәснәви вә қийма рәсимләрни чаплашқа тәйярлиқ қиливатқанлиқи, йолларға панус есилғанлиқи, кишиләрниң поҗаңза көтүрүвалғанлиқи, базарларда чағанлиқ буюмларни сетивелиш қизғинлиқи көтүрүлгәнлики, һәммә җайни қоюқ "байрам кәйпияти" қаплиғанлиқи хәвәр қилинған.

Униңдин башқа ютуб қанилида чаған байрими мунасивити билән "пәридио 2021-йиллиқ тор сәнәт кечилики" ниң нәқ мәйдан видийоси тарқитилған болуп, риясәтчиләрниң кийимидин тартип сәһнә сөзлиригичә "чағанлиқ мәдәнийәт" наһайити рошән ипадиләнгән; уйғур сәнәт саһәсидә көзгә көрүнгән шәхсләр билән карханичилар бирликтә паалийәт қилған һәмдә көңүл ечиш билән елан тәшвиқатини бирләштүрүп, уйғурларниң бүгүнки вәзийәттә заманниң алдида кетиватқанлиқидәк қизғин көрүнүш пәйда қилишқа тиришқан.

Анализчиларниң қаришичә, байрам бир милләтниң коллектип еңини тутуп туридиған нәрсә, хитайниң чаған байримини дағдуғилиқ тәбриклиши вә һәммә йәрдә омумлаштурушқа урунуши әзәлдин давамлишип кәлгән болсиму, йеқинқи йилларда бу миллий ассимилятсийә вә зораванлиқ түсини елип техиму әвҗ елишқа башлиған. Хитайниң мәқсити уйғурлар вә башқа милләтләрниң әнәниви байрамлирини суслаштуруп һәм йоқитип, хитайниң чаған байрими, тавуз чағини дегәндәк байрамлирини униң орниға дәсситиштур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт