Bu yilmu Uyghur rayonida chaghan bayrimi ötküzüsh shamili küchiyip ketken

Muxbirimiz jewlan
2021-02-12
Share

Xitay taratqulirining bes-beste taratqan xewerlirige qarighanda, bügünmu Uyghur rayonida chaghan bayrimi ötküzüsh shamili ewj aldurulghan bolup, sheherdin yézilarghiche, kocha-koylardin mehellilergiche bu bayramni ötküzüsh Uyghurlarning "Wetenni söyüsh, jungxu'a milliti en'enisige warisliq qilish" meydanini sinaydighan muhim pa'aliyet bolup qalghan.

9-Féwral tarqalghan süretlik xewerlerde qeshqer qedimiy sheher rayonidiki ahalilerning chaghan kélishi harpisida öylirining aldigha xitayche mesnewi we qiyma resimlerni chaplashqa teyyarliq qiliwatqanliqi, yollargha panus ésilghanliqi, kishilerning pojangza kötürüwalghanliqi, bazarlarda chaghanliq buyumlarni sétiwélish qizghinliqi kötürülgenliki, hemme jayni qoyuq "Bayram keypiyati" qaplighanliqi xewer qilin'ghan.

Uningdin bashqa yutub qanilida chaghan bayrimi munasiwiti bilen "Peridi'o 2021-yilliq tor sen'et kéchiliki" ning neq meydan widiyosi tarqitilghan bolup, riyasetchilerning kiyimidin tartip sehne sözlirigiche "Chaghanliq medeniyet" nahayiti roshen ipadilen'gen؛ Uyghur sen'et saheside közge körün'gen shexsler bilen karxanichilar birlikte pa'aliyet qilghan hemde köngül échish bilen élan teshwiqatini birleshtürüp, Uyghurlarning bügünki weziyette zamanning aldida kétiwatqanliqidek qizghin körünüsh peyda qilishqa tirishqan.

Analizchilarning qarishiche, bayram bir milletning kolléktip éngini tutup turidighan nerse, xitayning chaghan bayrimini daghdughiliq tebriklishi we hemme yerde omumlashturushqa urunushi ezeldin dawamliship kelgen bolsimu, yéqinqi yillarda bu milliy assimilyatsiye we zorawanliq tüsini élip téximu ewj élishqa bashlighan. Xitayning meqsiti Uyghurlar we bashqa milletlerning en'eniwi bayramlirini suslashturup hem yoqitip, xitayning chaghan bayrimi, tawuz chaghini dégendek bayramlirini uning ornigha dessitishtur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet