Uyghur diyaridiki xitay oqutquchilar Uyghur oqughuchilarning öyliride chaghan ötküzüshke uyushturulghan

Muxbirimiz erkin
2018-02-16
Élxet
Pikir
Share
Print

Xitay hökümiti chaghan bayrimida her xil usullarni ishqa sélip, Uyghurlarni chaghan bayrimi ötküzüshke qistighan.

Xitay axbarat wasitilirining ashkarilishiche, da'iriler bu yilliq chaghanda xitay oqutquchilarni seperwer qilghan. Ularni Uyghur oqughuchilirining a'ililirige bérip, chaghanni oqughuchilarning a'ililiride bille ötküzüshke teshkilligen. Turpan rayonining özide 10 ming oqutquchi yéza-kentlerge chüshüp, chaghanning harpa kéchisini Uyghur oqughuchilirining a'ililiride ötküzüshke orunlashturulghan.

Uyghur aptonom rayonluq partkom bu yilning bashlirida uqturush chiqip, chaghanni hemme milletning teng ötküzüshi töwen'ge chüshken her qaysi xizmet guruppilirining eng asasliq siyasiy wezipisi ikenliki we buning bir muqimliq tedbiri ikenlikini élan qilghan. Biraq chet'eldiki Uyghur pa'aliyetchiler musulman Uyghurlarni mejburiy chaghan ötküzüshke orunlashturushni tenqidlep, buning "Medeniyet zorawanliqi" we "Mejburiy assimilyatsiye" siyasiti ikenliki shundaqla bu Uyghurlarning örp-adetlirige qilin'ghan éghir hörmetsizlik ikenlikini tekitligen idi.

Ürümchide chiqidighan "Merkizi sheher istémalchilar etigenlik géziti" ning xewiride körsitilishiche, turpanda Uyghur oqughuchilarning a'ilisige bérip chaghan ötküzüshke orunlashturulghan bir xitay oqutquchi özining birinchi qétim bir az sanliq milletning öyide chaghan bayrimi ötküzgenlikini bildürgen. U, "Biz mesnewilerni birge chapliduq, birge tügre tügduq, tamaqlargha birge hemdastixan bolduq, öz ara alaqe, almashturush arqiliq bir-birimizge bolghan chüshenchimiz ashti. Héssiyatimiz chongqurlashti," dégen.

Xitay hökümitining xitay puqralirini pilanliq Uyghur a'ililerde chaghan ötküzüshke orunlashturushi Uyghur élining bashqa jayliridimu yüz bergen. Uyghur aptonom rayonluq partkomning zuwani bolghan "Shinjang géziti" ning xewer qilishiche, aptonom rayonluq siyasiy-qanun komitétining sékrétari ju xeylün chaghanni xoten nahiyesining baghchi bazirigha qarashliq yuqiriqi bagh kentidiki bir Uyghur a'iliside ötküzgen.

Toluq bet