Xelq'aradiki 40 nechche teshkilat xilton'gha xotende chéqilghan meschit ornigha méhmanxana sélishi seweblik bayqut élan qildi

“Amérika islami munasiwetler kéngesh” ni ‍öz ichige alghan amérika we xelq'aradiki 40 nechche teshkilat, xilton guruhigha xoten shehiridiki chéqiwétilgen meschit ornigha méhmanxana séilishi seweblik bayqut élan qilghan.

Amérika islami munasiwetler kéngishi qatarliq teshkilatlar 16-séntebir xilton guruhining washin'gton shehiridiki “Astane xilton” méhmanxanisi aldida axbarat élan qilip, xilton guruhini xotendiki méhmanxana qurulushi bilen bolghan toxtamini bikar qilishni ret qilghanliqi üchün dunya miqyasini bayqut qilishqa chaqirghan.

Yéqinda en'gliyening “Sikay xewerliri” (asman xewerliri) qanili xoten sheher merkizidiki 2018-yili chiqéwétilgen bir meschitning ornigha xilton hampiton méhmanxanisi séliniwatqanliqini ashkarilighan. Bu xewer “Amérika islami munasiwetler kéngishi” qatarliq teshkilatlarning diqqitini qozghighan. Amérikadiki eng chong musulmanlar teshkilati bolghan “Amérika islami munasiwetler kéngishi” ötken ayda xilton guruhigha oltomatum tapshurup, uning xotendiki qurulushni toxtitishini, eger toxtatmisa uninggha bayqut élan qilidighanliqini bildürgen.

“Amérika islami munasiwetler kéngishi” ning qeyt qilishiche, xilton guruhi xotendiki méhmanxana qurulushi bilen bolghan toxtamini bikar qilishni ret qilghan. “Amérika islami munasiwetler kéngishi” ning ijra'iye diréktori nihad awad “Biz kishilerni, jümlidin hejge baridighan, medine we mekkini ziyaret qilidighanlarni xilton ‍özining chéqiwétilgen meschit ornigha méhmanxana sélishni toxtatmighuche, xilton méhmanxanisida yatmasliqqa chaqirimiz” dégen.