D u q: xitayning pasport yighish herikitidin qattiq endishe qiliwatimiz

D u q jüme küni bayanat élan qilip, xitayning Uyghur rayonida bashlighan pasport yighiwélish herikitidin qattiq endishe qiliwatqanliqini we buni qattiq tenqidleydighanliqini bildürdi.

Bayanatta qeyt qilishiche, pasport yighiwélish herikiti qarimaqqa barliq ahalilerge qaritilghandek qilsimu, emma xitay da'iriliri burun éniq tedbirlerni yolgha qoyup, Uyghurlarning sayahet erkinlikige cheklime qoyghan.

Yéqinda manas, qumul, ürümchining midung rayoni, shixenze qatarliq nahiye, sheherler uqturush chiqirip, ahalilerdin pasportini alaqidar orunlargha tapshurushni telep qilghan. Buningdin sirt pasportning xoten, qeshqer, ghulja qatarliq wilayet, sheherlerdimu yighiwéliniwatqanliqigha da'ir xewerler tarqalghan idi.

Xitay hökümiti 2015‏-yili Uyghurlargha pasport cheklimisini bikar qilghanliqini élan qilip, bezi rayonlarda xelqni pasport élishqa ilhamlandurghan. Bu xitay axbarat wasitiliride keng xewer qilin'ghan idi.

Emdi uning néme üchün pasportlarni tuyuqsiz yighiwélish niyitige kelgenliki melum emes. Da'iriler hazirgha qeder buninggha héchqandaq qayil qilarliq chüshenche bermigen.

D u q bayanatida yene “Pasportni musadire qilish we qattiq bashqurush, yéqinqi yillardin béri sherqiy türkistanda téximu jiddiy mesilige aylandi” dégen.