Хитайниң уйғур районидики сот тармақлири йеқинқи 3 йилда 300 миң делони бир тәрәп қилған

Мухбиримиз әркин
2019-04-19
Елхәт
Пикир
Share
Принт

Хитайниң уйғур районидики сот тармақлири йеқинқи 3 йил ичидә 300 миң делони бир тәрәп қилип, 70 миң кишини «қара тизимлик» кә киргүзгән.

«Җуңго хәвәрләр» ториниң 18‏-апрел ашкарилишичә, уйғур аптоном районлуқ алий сотниң баянатчиси ваң хәйчин райондики һәр қайсий сот тармақлириниң йеқинқи 3 йил ичидә 322 миң 81 дело тапшурувелип, 302 миң 910 делони бир тәрәп қилғанлиқи, бу арқилиқ «хәлқниң инкаси күчлүк болған көрүнәрлик мәсилиләрни һәл қилғанлиқи» ни билдүргән. У «иҗра қилиш қийин болған мәсилиләр асасән һәл қилинип, бу басқучлуқ нишан вақтида ишқа ашурулди» дегән. Лекин ваң хәйчин «иҗра қилиш қийин болған» бу мәсилиләрниң қандақ мәсилә икәнлики, шуниңдәк 3 йил ичидә бир тәрәп қилинған 300 миңдин артуқ делониң қайсий мәсилиләргә четилидиғанлиқини чүшәндүрмигән.

Хитай һөкүмити 2017‏-йили февралдин башлап уйғур районида кәң көләмлик тутқун башлап, 2 милйондәк кишини йиғивелиш лагерлириға қамиған. Лагердики бир қисим тутқунларни коллектип қамақ җазалириға һөкүм қилип, ичкири хитай өлкилиридики түрмиләргә йөткигән. Хитайниң бу қилмиши хәлқарада «инсанийәткә қарши җинайәт» дәп әйибләнгән иди.

«Җуңго хәвәрләр» тори «қара тизимлик» кә киргүзүлгән 70 миң кишиниң өзиниң «мәҗбурийитини ада қилмай ишәнчини йоқатқан кишиләр» икәнликини илгири сүргән. «Қара тизимлик» тики 60 миңдәк кишиниң йолучилар айропиланида сәпәр қилиши, 14 миңдәк кишиниң пойизға олтуруши чәкләнгән. Уйғур кишилик һоқуқ тәшкилатлириниң илгири сүрүшичә, хитай һөкүмити нурғун уйғурларниң кимликигә диний, сиясий вә миллий тендинсийәси сәвәблик қизил чекип қоюп қойғачқа, уларниң айропилан вә пойизға олтуруп сәпәр қилиши қаттиқ кашилиға учримақта икән.

Пикирләр (0)
Share
Толуқ бәт