Чәрчән наһийәси йәнә хитай өлкилиридин алаһидә имтиязлар билән оқутқучи қобул қилидикән

Мухбиримиз ирадә
2019-02-07
Елхәт
Пикир
Share
Принт

Уйғур елидики наһийәләр хитай өлкилиридин зор түркүмдә оқутқучи қобул қилмақта.

7-Феврал күни чәрчән наһийәлик һөкүмәт өз тор бетидә наһийә тәвәсидики башланғуч вә оттура мәктәпләргә хитай миқяси бойичә җәмий 86 нәпәр оқутқучи қобул қилидиғанлиқи һәққидә уқтуруш тарқитилған.

Уқтурушта йәнә наһийә тәвәсидики башқа хизмәт орунлириға 200 нәпәр хизмәтчи хадим қобул қилинидиғанлиқи билдүрүлгән болсиму, әмма униңда хизмәтниң немилики ениқ тилға елинмиған. Уқтурушта бу орунға қобул қилинғанларниң ятақ вә турмушиниң һөкүмәт тәрипидин бирдәк орунлаштурулидиғанлиқи, нопусиниң йәрликкә йөткилип, балилириниң 15 йил бойичә һәқсиз оқутулидиғанлиқи, қобул қилинғанларниң җорилириниңму оқуш тарихиға қарап туруп мувапиқ хизмәт билән тәминлинидиғанлиқидәк имтиязлар алаһидә әскәртилгән.

Чәрчән наһийәлик даириләр бултур 8-айдила мәмликәт миқяси бойичә 300 нәпәр сақчи хадими қобул қилидиғанлиқи тоғрисида уқтуруш чиқирип, қобул қилинидиған сақчиларға өй ярдәм пули, қишлиқ иссиниш пули вә қошумчә мукапат пули қетилип, айда 10 миң йүәнгә йеқин мааш берилидиғанлиқини җакарлиған иди.

Йеқиндин буян уйғур елидики һәрқайси наһийәләрниң тор бәтлиридә мушу хилдики оқутқучи, сақчи вә башқа әдлийә хадимлири қобул қилиш һәққидики уқтурушларниң көпийиши диққәт қозғимақта.

Муһаҗирәттики уйғур көзәткүчиләр буниң бир җиддий сиясий вәзийәтниң еһтияҗидин болуватқанлиқини пәрәз қилишмақта.

Пикирләр (0)
Share
Толуқ бәт