ئەرەبچە يېزىلغان «ئۇيغۇرلار» ناملىق كىتاب قاھىرە كىتاب يەرمەنكىسىدە ئورۇن ئالدى

مىسىر پايتەختى قاھىرەدە ئۆتكۈزۈلىۋاتقان خەلقئارالىق قاھىرە كىتاب يەرمەنكىسىدە ئەرەبچە يېزىلغان «ئۇيغۇرلار» ناملىق كىتابمۇ ئورۇن ئالغان. تۈركىيەدە تەسىس قىلىنغان ئۇيغۇرچە «ئىستىقلال» تورىنىڭ بۇ ھەقتىكى خەۋىرىدە بايان قىلىنىشىچە، مەزكۇر كىتاب ئىراقلىق دوكتور سۇئاد ھادى تەرىپىدىن يېزىلغان، ئۇنىڭدا ئۇيغۇرلارنىڭ بۈگۈنى ۋە ئۆتمۈشى، جۈملىدىن ئىلگىرى قۇرۇلغان «شەرقى تۈركىستان جۇمھۇرىيەتلىرى» ھەققىدە مەلۇماتلار بېرىلگەن.

مەزكۇر تورنىڭ بىلدۈرۈشىچە، ئۇيغۇرلار ھەققىدە ئىلمىي مەلۇمات يېتەرسىزلىكى، ئۇيغۇرلارنىڭ ئەرەب دۇنياسىغا تونۇلۇشىدىكى بىر بوشلۇق بولۇپ، مەزكۇر كىتابنىڭ بۇ يەرمەنكىدە ئورۇن ئېلىشى كۆرگەزمىدىن خەۋەردار ئۇيغۇرلارنى سۆيۈندۈرگەن. ماتېرىياللاردا كۆرسىتىلىشىچە، قاھىرە يەرمەنكىسى 1969 - يىلدىن بېرى ئۆتكۈزۈلمەكتە. 27 - يانۋار كۈنى باشلانغان بۇ يەرمەنكە 10 - فېۋرال كۈنى ئاخىرلىشىدۇ. ئىستىقلال تورىنىڭ خەۋىرىدە دېيىلىشىچە، بۇ قېتىمقى يەرمەنكىگە 35 دۆلەتتىن 850 نەشرىيات ئورگىنى قاتناشقان.