Йеқинқи 10 күндә 1100 нәпәр уйғур ишчи корона вирусиниң мәркизи болған хитай өлкилиригә йөткәлгән

Мухбиримиз әркин
2020-03-02
Елхәт
Пикир
Share
Принт

Пүтүн хитайни корона вируси қаплап, нурғун өлкә-шәһәрләр қамал қилинған мәзгилдә хитай һөкүмити «ешинча әмгәк күчлири» намидики уйғур ишчилирини вирус тарқалған хитай өлкә-шәһәрлиригә давамлиқ йолға салмақта.

Хитайдики «җуңго хәвәрлири» ториниң 1‏-марттики учурида ашкарилинишичә, йеқинқи 10 күн ичидә уйғур аптоном райониниң җәнубидики хотән, қәшқәр қатарлиқ 3 вилайәт бир областтин 1100 нәпәр уйғур ишчи хитай өлкилиригә йолға селинған.

Бу, 26‏-феврал күни қәшқәр вилайитидин хунәнниң чаңша шәһиридә йолға селинған 242 нәпәр уйғур ишчини өз ичигә алидикән. Хитай һөкүмити 2‏-айниң 22‏-күни тунҗи түркүмдә хотәнлик 171 нәпәр уйғур ишчини хунәнгә йолға салғаниди.

Хитайниң вухән шәһиридә партлиған корона вируси пүтүн хитайни қаплап, нурғун өлкә-шәһәрләр карантинға елинған, нурғун завутлар тақилип, хитай пуқралириниң талаға чиқиши чәкләнгән мәзгилдә уйғур ишчилирини вирус тарқалған бу өлкиләргә йолға селиши хәлқара таратқуларниң диққитини қозғап, чәтәлдики уйғурларда хитайниң ғәризигә қарита гуман пәйда қилған. Бәзи көзәткүчиләр хитай даирилириниң һәрикитини «пиланлиқ тәвәккүлчилик» дәп әйиблигәниди.

Хитай һөкүмити уйғур «ешинча әмгәк күчлири» ни йөткәп, уларниң намратлиқтин қутулушиға ярдәм қиливатқанлиқини илгири сүрсиму, лекин униң мәзкур пилани хәлқарада җиддий соал пәйда қилмақта. Австралийә истратегийәлик сиясәт институти 1‏-март күни доклат елан қилип, хитайниң лагерлардики түмәнлигән уйғур тутқунлирини уйғур райониниң ичи вә сиртидики завутларға йөткәп, дунядики даңлиқ маркиларға мәһсулат ишләйдиған бу завутларда мәҗбурий ишлитиватқанлиқини илгири сүргән. «Җуңго хәвәрлири» ниң ашкарилишичә, һазирға қәдәр ичкири өлкиләргә йолға селинған уйғурлар ичидә хотәнлик ишчилар әң көп салмақни игиләйдикән.

Пикирләр (0)
Share
Толуқ бәт