Хитай ташқи ишлар министири ваң йи мисирдики зиярити давамида хитайниң уйғур елидики сиясәтлирини ақлиған

Мухбиримиз ирадә
2020-01-09
Елхәт
Пикир
Share
Принт

Хитай ташқи ишлар министири ваң йи хитай һөкүмитиниң уйғур елидә йолға қойған сиясәтлирини ақлап «хитай шинҗаңдики әсәбийликни йоқитиш сиясәтлири арқилиқ йәршари миқясидики террорлуққа қарши туруш һәрикитигә һәссә қошти,» дегән.

У бу сөзләрни 8-январ күни мисирдики рәсмий зиярити җәрянида мисир ташқи ишлар министири самиһ шүкри билән ортақ уюштурулған ахбарат йиғинида қилған.

Шинхуа агентлиқиниң хәвәр қилишичә, ваң йи сөзидә уйғур районидики мәсилиләрниң «хитайниң ички иши» икәнликини қаттиқ тәкитләш билән биргә «шинҗаңдики мәсилә қандақтур кишилик һоқуқ вә дини әркинлик мәсилиси әмәс, у бөлгүнчилик вә террорлуқ билән күрәш қилиш мәсилисидур,» дәп көрсәткән.

Мисирниң «бүгүнки мисир» гезитиниң хәвиригә қариғанда, икки дөләт ташқи ишлар министирлири учришишта мисирниң хитай билән болған һәрсаһә һәмкарлиқини күчәйтиш һәққидә сөһбәтләшкән икән. Болупму хәвәрдә мисирниң хитай билән иқтисадий вә сиясий һәмкарлиқини күчәйтиш вә «бир бәлвағ бир йол» қурулуши бойичә һәмкарлишиш арзусиниң интайин күчлүк икәнлики тәкитләнгән. «Бүгүнки мисир» гезити бу һәқтики хәвиридә ваң йиниң уйғур елидики лагерларни ақлап қилған сөзлиригиму наһайити кәң орун бәргән вә «хитай ташқи ишлар министири ваң йи ғәрб һакимийәтлирини ялған-явидақ сөзләр арқилиқ хитайниң мусулман дуняси билән болған мунасивитини бузмаслиқ һәққидә агаһландурди,» дегән.

Мисир һөкүмити 2017‏-йили 7‏-айниң башлирида мисирда яшаватқан нәччә миңлиған уйғурниң тутқун қилиниши, хитайға мәҗбурий қайтурулуши вә ғайиб қилинишида хитай билән қаттиқ һәмкарлашқан иди. Әйни чағдики хәвәрләрдә тутқун башлиништин бурун хитай билән мисирниң «террорлуққа қарши туруш келишими» имзалиғанлиқи вә келишим имзалинип, 3 һәптидин кейин тутқун башланғанлиқи, мисир һөкүмитиниң хитай сақчилириға уйғурларни тутқун қилиш, сорақ қилиш вә хитайға қайтуруп кетиши үчүн мислисиз һоқуқ бәргәнлики ашкариланған иди.

«Бүгүнки мисир» гезитиниң ейтишичә, бу қетим ваң йи билән мисир ташқи ишлар министири самиһ шүкри арисидики учришиштин кейин, икки тәрәп йәнә «террорлуқ билән күрәш қилиш вә шундақла әсәбийликни йоқитиш тәҗрибилирини алмаштуруш җәһәттики һәмкарлиқни күчәйтиш» һәққидә келишкән.

Пикирләр (0)
Share
Толуқ бәт