Даириләр уйғур елидин 64 нәпәр “вәтәнпәрвәр диний зат” ни таллап хитай өлкилиригә екскурсийигә әвәткән

Мухбиримиз қутлан
2016-11-21
Share

Уйғур елиниң сиясий вәзийитигә йеқиндин диққәт қилип келиватқан көзәткүчиләр даириләрниң райондики һәр дәриҗилик ислам диний җәмийәтлириниң васитиси билән аталмиш “вәтәнпәрвәр диний зат” ларни ясап чиқириватқанлиқини илгири сүрмәктә.

“шинҗаң гезити” ниң бу һәқтики хәвиригә қариғанда, даириләр уйғур елидин җәмий 64 нәпәр “вәтәнпәрвәр диний зат” ни таллап хитай өлкилиригә екскурсийигә әвәткән.

Хәвәрдә дейилишичә, уларниң көпинчилири уйғур елиниң һәрқайси җайлиридики мәсчитләргә һөкүмәт тәрипидин тәйинләнгән яш имамлар икән. Улар һөкүмәт хираҗити билән 10-айниң 19-күнидин 11-айниң 19-күнигичә болған бир ай җәрянида шәнши, җяңсу, хунән өлкилиридики мәсчитләр билән йәрлик ислам дини җәмийәтлирини екскурсийә қилған.

Игилинишичә, бу паалийәтни хитай мәмликәтлик мәркизий иттипақ комитети, яшлар бирләшмиси вә уйғур аптоном районлуқ иттипақ комитети бирликтә тәшкиллигән болуп, екскурсийә өмикидикиләр қайтип келип өзлири турушлуқ җайларда тәшвиқат паалийәтлири билән шуғуллинидикән.

Улар екискурсийәни ахирлаштуруп үрүмчигә қайтип кәлгәндин кейин даириләргә ипадә билдүрүп, өзлириниң мәсчитләрдә “муқимлиқ вә иттипақлиқ” һәққидә вәз сөзләйдиғанлиқини, “диний әсәбийлик” кә қарши туруп компартийәниң дин вә милләтләр сияситини һимайә қилидиғанлиқини билдүргән.

Муһаҗирәттики уйғур көзәткүчиләр билән сиясий анализчилар хитай һөкүмитиниң уйғур елиниң муқимлиқини тутуп туруш үчүн өзлири бир қоллуқ тәрбийиләп йетиштүргән аталмиш “вәтәнпәрвәр диний зат” лардин пайдилиниватқанлиқини илгири сүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт