Хәлқара кәчүрүм тәшкилати: «дохтур гүлшән аббасниң саламәтлик әһвали җиддий әндишә қозғимақта»

Мухбиримиз әркин
2020-06-05
Елхәт
Пикир
Share
Принт

Хәлқара кәчүрүм тәшкилати җиддий чақириқ елан қилип, ғайиб уйғур дохтури гүлшән аббасниң саламәтлик әһвалидин җиддий әндишә қилиниватқанлиқи, униң дәрһал қоюп берилишини тәләп қилди. Мәзкур тәшкилат өткән һәптә елан қилған чақириқида, кишиләрни униң һазирқи әһвали вә қәйәрдә икәнликини ашкарилашни тәләп қилип, үрүмчи шәһәрлик җамаәт хәвпсизлик идарисиниң башлиқи тав хоңҗүнгә хәт йезишқа чақирған.

Чақириқнамидә тәкитлинишичә, 2018-йили 10-сентәбирдин бери из-дерәксиз ғайиб болған дохтур гүлшән аббасниң қан бесим, бәл вә баш ағриқи қатарлиқ қәрәллик тәкшүртүп туруши вә давалиниши керәк болған аста характерлик кесәлликлири бар болуп, бу униң саламәтлик әһвалиға қарита җиддий әндишә пәйда қилмақтикән. Гүлшән аббас үрүмчидики нефит-химийә дохтурханисиниң пенсийәгә чиққан дохтури болуп, 2018-йили 10-сентәбирдин башлап ғайиб болған.

Гүлшән аббасниң ғайиб болуши униң америкадики сиңлиси рошән аббасниң кишилик һоқуқ паалийити билән мунасивәтлик, дәп қарилип, хәлқара таратқуларниң диққитини қозғиғаниди. Хәлқара кәчүрүм тәшкилатиниң билдүрүшичә, хитай даирилири һазирға қәдәр униң аилисидикиләргә униң қәйәрдә икәнлики һәққидә рәсмий учур бәрмигән. Лекин, униң аилисидикиләр гүлшән аббасниң «қайта-тәрбийәләш лагери» ға елип кетилгәнликигә ишинидикән.

Хәлқара кәчүрүм тәшкилати хитай даирилиридин гүлшән аббасни қоюп беришни, у қоюп берилгичә униң қәйәрдә икәнликини ашкарилиши, аилиси билән көрүштүрүши, адвокат тутуши вә мувапиқ давалашқа еришишигә йол қоюши, униң тән җазаси вә һәр хил қопал муамилигә учримаслиқиға капаләтлик қилишини тәләп қилишқа чақирған.

Пикирләр (0)
Share
Толуқ бәт