Хәлқара кәчүрүм тәшкилати уйғур кийим модели мәрдан ғаппарниң дәрһал қоюп берилишини тәләп қилди

Мухбиримиз әркин
2020-08-21
Елхәт
Пикир
Share
Принт

Хәлқара кәчүрүм тәшкилати җиддий чақириқнамә елан қилип, хитайниң даирилириниң уйғур кийим модели мәрдан ғаппарни дәрһал қоюп беришини тәләп қилди.

Хәлқара кәчүрүм тәшкилатининиң тәкитлишичә, мәрдан ғаппар дәрһал қоюп берилиши яки униң қанунға хилап бирәр һәрикити болса хәлқарада бирдәк етирап қилинған өлчәмләргә асасән әйиплиниши керәк икән. Мәзкур тәшкилат 21-авғуст елан қилған чақириқида кишиләрниң куча наһийәлик җамаәт хәвпсизлики идарисиниң башлиқи ваң шявмиңға хәт йезип, мәрдан ғаппарниң әһвалидин, униң тән җазаси яки башқа қопал муамилиләргә учришидин җиддий әндишә қиливатқанлиқини билдүрүши тәләп қилинған.

Мәрдан ғаппар бу йилниң 1-айда хитайниң фошән шәһиридә тутқун қилинип, кучаға елип келингән. Йеқинда униң кучадики бир қамақханида сүрәткә елинған видейоси чәтәл таратқулирида елан қилинип, хәлқарада қаттиқ ғулғила қозғиған. Хитай һөкүмити йеқинда униңға «сәһийә хадимлириға һуҗум қилғанлиқи сәвәблик ‹мәҗбурлаш тәдбири' қоллинилғанлиқи» ни илгири сүргән.

Хәлқара кәчүрүм тәшкилатиниң тәкитлишичә, хитай һөкүмити уни қоюп бериштин бурун униң қәйәрдә икәнлики, униң аилиси вә өзи талиған адвокати билән көрүшүшигә йол қоюши, униң тән җазаси вә қопал муамилигә учримаслиқиға капаләтлик қилиши керәк икән. Хитайниң 2017-йили башланған чоң тутқунида уйғур җәмийитиниң һәр қайси саһәлиридики сәрхилләр асаслиқ йоқитиш нишанлириниң биригә айланған иди.

Пикирләр (0)
Share
Толуқ бәт