Хитай 19-қурултийи алдида 15 нәпәр юқири дәриҗилик әмәлдарға аит җаза муәййәнләштүрүлди

Мухбиримиз үмидвар
2017-10-15
Елхәт
Пикир
Share
Принт

Хитай компартийисиниң 19-қурултийи башлинишқа аз вақит қалғанда чақирилған хитай компартийиси 18-қурултийиниң 7-омумий йиғинида 15 нәпәр сабиқ юқири дәриҗилик рәһбири шәхскә компартийәдин қоғлап чиқириш җазаси беришкә аит қарар муәййәнләштүрүлгән.

«Америка авази» ниң хәвиридә қәйт қилинишичә, хитай 18-қурултийиниң мәзкур әң ахирқи, йәни, 7-қетимлиқ омуми йиғини шәнбә күни башланған болуп, бу арқилиқ 19-қурултайниң ахирқи тәйярлиқи вә ши җинпиң қатарлиқларниң орни бекитилиду.

Мәзкур йиғинда бирдәк муәййәнләштүрүлгән хитай мәркизи интизам тәкшүрүш комитети җазалап, сиясий бюро тәстиқлиған партийидин чиқирилиш җазасиға учриған 15 кишиниң ичидә, хитай компартийиси мәркизи комитети әзаси, хитай әдлийә министири ву әййиң, чоңчиң шәһәрлик партийә комитетиниң секретари сун җеңсәй, тйәнҗин шәһириниң башлиқи вә тйәнҗин партком мувәққәт секретари хуң шинго, хитай дөләтлик истрахуанийә башқуруш вә назарәт қилиш комитетиниң рәиси шяң җүнбо қатарлиқ сабиқ әмәлдарлар шуниңдәк йәнә гәнсу вә башқа бир қанчә өлкә рәһбири һәм хитай қораллиқ күчлириниң бир қанчә нәпәр юқири дәриҗилик қомандани бар икән.

Буларниң ичидики чоңчиң партком секретари сун җеңсәй қатарлиқларниң 19-қурултайда сиясий бюроға кириш риқабити күчлүк шәхс икәнлики тәһлил қилинған иди.

Хитай компартийисиниң 19-қурултийи хитайниң ички қисмидила әмәс, бәлки хәлқарадиму зор диққәт қозғаватқан болуп, бу қурултайниң ши җинпиңниң хитай компартийисиниң ички қисмидики өзигә қарши турғучи гуруһларни бир тәрәп қилип, һакимийәт вә өз орнини техиму мустәһкәмлийәлиши билән биваситә мунасивәтлик икәнлики тәһлил қилинмақта.

Пикирләр (0)
Share
Толуқ бәт