Ши җинпиң 3-қетим хитайниң һакимийәт бешиға келиши билән тәң хитайниң пай чеки чүшүп кәткән

22-Өктәбир күни хитай компартийәсиниң 20-қурултийини аяғлаштуруп, “хитайниң өмүрлүк падишаһи” лиқ таҗини кийгән ши җинпиң өз адәмлиридин тәшкил тапқан йеңи рәһбәрлик гуруһини башлап, мухбирларниң алдиға чиққан. Шуниңдин башлап, хитайниң чоң ширкәтлири өзиниң әң қараңғу күнлирини күтүвалған.

“бломберг” ториниң хәвәр қилишичә, ши җинпиңниң 3-қетим хитай һакимийитиниң чиқиши билән тәң, хитайдики әң чоң иҗтимаий алақә васитиси болған “вичат”, әң чоң сода суписи болған “әли баба” вә “җиндуң”, әң чоң издәш тори болған “бәйду” қатарлиқ чоң ширкәтләрниң пейи бирақла чүшүп кәткән, ширкәт хоҗайинлири бир күндә 9 милярд доллар зиян тартқан.

“KGI асия” ниң хоңкоңда турушлуқ мәбләғ селиш истратегийәси мутәхәссиси кенни венниң қаришичә, пай чәктики бу чүшүш, хитай базириға мәбләғ салғучиларниң писхикисидики еғир тәвринишни көрситидикән.

Мәлум болушичә, хитай ширкәтлири хоңкоң базири арқилиқ американиң пай чеки базириға киргән болуп, “бломберг” ториниң хәвиригә қариғанда, һазир хоңкоңниң пай чеки базирида пайчикларда қорқуш вә хитайниң йоқириқи ширкәтлириниң пейини сетип қутулуш йүзлиниши пәйда болған. Буниңдики сәвәб, ши җинпиң һөкүмити ковид сәвәбидин пуқралирини қамал қилиш сияситини давамлаштуруп, иқтисадини аллиқачан вәйран қилишқа башлиған болуп, бу сиясәтни давамлаштуридиғанлиқи мәлум болғандин кейин, көплигән мәбләғ салғучилар хитай базиридин үмидсизлинишкә башлиған.