Уйғур аптоном районлуқ һөкүмәт «шинҗаң һөҗҗәтлири» ни ақлап баянат елан қилған

Мухбиримиз әркин
2019-11-28
Елхәт
Пикир
Share
Принт

Уйғур аптоном районлуқ һөкүмәт 28‏-ноябир баянат елан қилип, хитайниң йеқинда ашкариланған лагерлар һәққидики мәхпий һөҗҗитигә инкас қайтурған.

Баянатта мәзкур һөҗҗәтләр инкар қилинмиған вә униңға һечқандақ чүшәнчә берилмигән болуп, пәқәтла мәзкур һөҗҗәтни ашкарилиған вә уни хәвәр қилған чәтәл таратқулири билән тәшкилатлирини әйиблигән.

Баянатта «чәтәл таратқулири вә тәшкилатлири аталмиш ‹шинҗаң мәхпий һөҗҗәтлири' ни баһанә қилип, шинҗаңниң ‹кәспий маһарәт тәрбийәләш' хизмитини кәң давраң қилмақта шундақла шинҗаңниң ‹террорлуққа қарши туруш', ‹әсәбийликни түгитиш' тә еришкән нәтиҗилиригә қара чаплимақта,» дейилгән.

24‏-Ноябир күни вашингтондики «хәлқара тәкшүрүш ахбаратчилиқи бирләшмиси» хитайниң лагердики тутқунларни қандақ башқуруш тоғрисидики мәхпий һөҗҗәтлирини ашкарилап, хитайни интайин осал әһвалға чүшүрүп қойған. Мәхпий һөҗҗәттә хитайниң уйғур дияри миқясида қурған лагерларниң көлими, лагерларни қандақ идарә қилиш, мәхпийликини сақлаш, лагерларни системилиқ башқуруш усули вә бу сиясәтниң пүткүл уйғур җәмийитигә көрситиватқан тәсири қатарлиқ нурғун тәпсилатлар ениқ көрситилгән. Мәзкур һөҗҗәтләр хәлқарада қаттиқ ғулғула қозғиған.

Кишилик һоқуқни көзитиш тәшкилати мәзкур һөҗҗәтләрни «ениқ җинайи пакит» дегән иди. Лекин уйғур аптоном районлуқ һөкүмәтниң баянатида бу орунларниң «җаза лагерлири» икәнликини рәт қилип, бу орунларда «һечқандақ чәклиминиң йоқлуқи, кишиләрниң әркинликини тартивелиштәк хаһишларниң мәвҗут әмәслики, кәспий тәрбийәләш мәркәзлиридики оқуғучиларниң һәр хил һәқ-һоқуқлириниң қанун бойичә қоғдилидиғанлиқи» ни илгири сүргән. Баянатта йәнә бу орунларда һечқандақ бир чәтәл пуқрасиниң тәрбийәлинип бақмиғанлиқи, «шинҗаңда тәқибләш вә алақә әркинликини чәкләшниң мәвҗут әмәслики» тәкитләнгән.

Пикирләр (0)
Share
Толуқ бәт