Хитайниң дөләт байрими мәзгилидә уйғур районида 14 миң нәпәр ярдәмчи сақчи бихәтәрлик үчүн вәзипәләндүрүлгән

Хитай дөләт байрими мәзгилидә уйғур аптоном районлуқ даириләр бихәтәрликкә капаләтлик қилиш үчүн, 14 миң нәпәр пуқрави ярдәмчи сақчини вәзипиләндүргән.

Хитай башқурушидики “тәңритағ тори” ниң хәвиригә қариғанда, уйғур елидики һәр дәриҗилик җамаәт хәвпсизлик органлири вә қатнаш сақчи тармақлири “дөләт байрими” мәзгилидики бихәтәрлик вәзийитини көздә тутуп, 14 миң нәпәр пуқрави ярдәмчи сақчини нөвәтчилик вәзиписигә қойған. Зор сандики бу ярдәмчи сақчилар байрам мәзгилидә хитай өлкилиридин келидиған саяһәтчиләрниң бихәтәрлики, шундақла уйғур дияридин қорғас еғизи вә башқа еғизлар арқилиқ оттура вә ғәрбий асия дөләтлиригә екиспорт қилинидиған қатнаш васитилириниң бихәтәрликини назарәт қилидикән.

Бу зор сандики ярдәмчи сақчилар пойиз истансилири, хәлқаралиқ қатнаш бекәтлири, саяһәт нуқтилири, аммивий сорунлар, сода-сарайлар вә муһим қатнаш түгүнлиридә нөвәтчиликтә туруп, чарлаш елип баридикән һәмдә өткән-кәчкән йолучиларни тәкшүридикән.

Хитай һөкүмити 2017-йилидин буян уйғур елидә кәң көләмлик тутқун һәрикитини елип бериш билән билән бир вақитта йәнә юқири техникилиқ мутләқ назарәт һәм тәқиб системисини омумлаштурған иди. Мана мушундақ юқири бесимлиқ назарәткә қаримай, хитай даирилириниң бу йиллиқ дөләт байрими мәзгилидә йәнә 14 миң нәпәр ярдәмчи сақчини вәзипиләндүрүши, һәр саһәниң күчлүк диққитини қозғимақта.

“тәңритағ тори” ниң хәвиридә, юқириқи бихәтәрлик тәдбирләрниң хитай дөләт байрими мәзгилидә саяһәтчиләр вә йолучиларниң бихәтәр аптомобил қоллиниши, қистаңчилиқниң алдини елишни мәқсәт қилғанлиқи илгири сүрүлгән болсиму, бирақ буниң хитайниң уйғур райондики чекидин ашқан бихәтәрлик тәдбирлириниң бир қисми икәнлики мөлчәрләнмәктә.