Чин гаң америка баш әлчиси бурнис билән көрүшүп, хитай-америка мунасивити йимирилишниң алдини елишни тәләп қилған

Мухбиримиз әркин
2023.05.08

 Хитай ташқи ишлар министири чин гаң 8-май күни американиң хитайда турушлуқ баш әлчиси николас бурнис билән көрүшүп, хитай-америка мунасивәтлириниң йимирилишиниң алдини елишни, буниң үчүн икки дөләт мунасивитини муқимлаштуруш һазирқи әң җиддий мәсилә икәнликини билдүргән.

Хитай ташқи ишлар министирлиқиниң торида елан қилинған бу һәқтики учурда, чин гаңниң сөзи қәйт қилинған болсиму, әмма николас бурнисниң униңға қандақ җаваб бәргәнлики тилға елинмиған. Баш әлчи николас бурнис 8-май твиттерда елан қилған учурида, өзиниң чин гаң билән чүшкән сүритини һәмбәһирләп, униң билән “америка-хитай мунасивәтлиридики хирис, шундақла мунасивәтләрни муқимлаштуруш һәм техиму юқири дәриҗилик алақиларниң зөрүрлүкини музакирә қилғанлиқи” ни ейтқан.

Хитай ташқи ишлар министирлиқиниң учурида ейтилишичә, чин гаң, хитай-америка оттурисида һадисә келип чиқишниң алдини елишта хитай-америка оттурисида негизлик ортақ тонуш болуши, дөләтләр билән дөләтләр, болупму икки чоң дөләт өзара тәң мәвҗут болуп турушта чоқум әмәл қилишқа тегишлик әқәллий чәк болуши керәкликини ейтқан. У йәнә америка чоқум хитайниң қизил сизиқиға һөрмәт қилиши, униң игилик һоқуқи, бихәтәрлики вә тәрәққият мәнпәәтигә зиян селишни тохтитиши, болупму тәйвән мәсилисидә “тәйвән мустәқилчилири” ни қоллашни тохтитишини тәләп қилған.

Нөвәттә, америка баш әлчисиниң чин гаңға қандақ җаваб бәргәнлики, шундақла икки тәрәпниң конкрет қандақ мәсилиләрни сөзләшкәнлики мәлум әмәс. Хитай американиң сабиқ авам палата рәиси нәнси пелусиниң өткән йили тәйвәнни зиярәт қилишидин кейин америка билән рәсмий алақә қаналлирини үзүп ташлиған. Арқидин бу йил 2-айда, хитай җасуслуқ һавашариниң америка һава бошлуқиға киришидин кейин америка ташқи ишлар министири билинкин хитай зияритини бикар қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.