Xitay rehberlirining mal - mülkini ashkarilashni telep qilghan xitay adwokat qolgha élindi

Xitay saqchi da'iriliri xitay rehberlirining mal - mülkini ashkarilashni telep qilghan jyangshiliq ayal kishilik hoquq adwokati lyu pingni qolgha élip, hakimiyetni aghdurushqa qutratquluq qilish jinayiti bilen eyibligen.

Lyu ping ilgiri musteqil namzatliq salahiyiti bilen jyangshi ölkisi shinuy sheherlik xelq qurultiyi saylimigha qatnashqan idi. Uning adwokati seyshenbe küni shinyuy sheherlik qamaqxanigha bérip, lyu ping bilen körüshüshni telep qilghan bolsimu, biraq qamaqxana da'irilirining ret qilishigha uchrighan.

Lyu ping qolgha élinishtin burun xitay rehberlirining mal - mülkini ashkarilashni telep qilish herikitige qatnashqan idi. Kishilik hoquqni közitish teshkilatining bildürüshiche, hazirgha qeder mezkur heriketke qatnashqan pa'aliyetchilerdin az dégende 10 kishi qolgha élin'ghan. Lyu pingning adwokati roytérs agéntliqigha bergen bayanatida, da'irilerning lyu pingni hakimiyetke qarshi aghdurmichiliqqa qutratquluq qilish bilen eyiblep qolgha alghanliqini bildürgen. Kompartiye hökümiti öktichilerni da'im hakimiyetke qarshi aghdurmichiliq we aghdurmichiliqqa qutratquluq qilish jinayiti bilen eyiblep basturup kelgen.