Үрүмчи шәһириниң сабиқ партком секретари ли җи парихорлуқ билән әйиблинип сотқа тапшурулди

Хитай таратқулириниң 14-апрел хәвәр қилишичә, 2015-йили 6-июл парихорлуқ қилмишлири сәвәблик тәкшүрүшкә йолланған үрүмчи шәһириниң сабиқ партком секретари ли җиниң делоси, чиңхәй өлкиси шиниң шәһәрлик тәптиш мәһкимиси тәрипидин тәкшүрүлүп, шиниң шәһәрлик оттура сотниң бир тәрәп қилишиға рәсмий тапшурулған.

Хитай хәвиридә әсли юрти әнхуй болған ли җиниң 1969-йилидин башлап уйғур аптоном районида хизмәт қилишқа башлиғанлиқи, униң шинҗаң йеник санаәт ширкитиниң башлиқи, бортала областиниң партком секретари, санҗи областиниң партком секретари, үрүмчи шәһириниң партком секретари, уйғур аптоном райони хәлқ қурултийиниң муавин мудири болған мәзгилләрдә "хизмәт қулайлиқидин пайдилинип, пара йейиш, һоқуқини қалаймиқан ишлитиш қатарлиқ интизамға еғир дәриҗидә хилаплиқ қилғанлиқи" сәвәблик қанун орунлириға тапшурулғанлиқи тилға елинған.

Ли җи үрүмчи шәһириниң партком секретарлиқ вәзиписини өтәватқан мәзгилидә "2009-йилдики 5-июл қирғинчилиқи" вә шу йили 3-сентәбирдики хитайларниң ваң лечүәнниң тәхттин чүшүшини тәләп қилиш намайиши йүз бәргән.

Униң 3-сентәбир күни хитай намайишчилириға қарита қутратқулуқ түсини алған нутуқ сөзлигәнлики үрүмчидики хәлқара таратқулар мухбирлири арқилиқ ашкариланғандин кейин, ли җи вә даириләр қаттиқ әйибләшкә учриған иди.

2009-Йили 7-сентәбир радиомиз зияритини қобул қилған илһам тохти ли җиниң 3-, 7-сентәбирдики хитайларниң кочиға чиқип уйғурларни уруш вәқәсини бир тәрәп қилишта чоң хитайчилиқ идийисини тәрғиб қилғанлиқини тәнқидлигән иди.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар