Америка әдлийә министири хитай билән һәмкарлашқан һолливод вә америкадики чоң ширкәтләрни әйиблиди

Ихтиярий мухбиримиз җәвлан
2020-07-17
Share
William-Barr.jpg Америка әдлийә министири вилям бар (William Barr ) әпәнди ақсарайда соз қилмақта. 2020-Йили 15-июл, вашингтон.
AP

Ройтрес агентлиқиниң 16-июл бәргән хәвиридин мәлум болушичә, америка әдлийә министири вилям бар (William Barr) 16-июл күни гралд форд президент музейида қилған сөзидә валт диснейни өз ичигә алған һолливод ширкәтлирини, шундақла алма, гогул, микрософт қатарлиқ чоң ширкәтләрни хитай билән һәмкарлашқанлиқи үчүн әйиблигән.

Вилям бар мундақ дегән: "гогол, микрософт, алма қатарлиқ ширкәтләр хитай компартийәси билән бәкму һәмкарлашқуси барлиқини намаян қилип кәлди. Һолливодму уларниң бесимиға баш егип, хитай компартийәсигә яхшичақ болуш үчүн өзиниң кинолириниму тәкшүрүштин өткүзидиған болди".

У америка ширкәтлириниң ғайәт зор хитай базириға кириш үчүн һәр қандақ тәдбир қоллинишқа рази икәнликини әйбләп: "хитай компартийәси нәччә он йиллиқ, нәччә йүз йиллиқ пилан түзиду, һалбуки, биз пәқәт пәсиллик кирим доклатиға көңүл бөлимиз. Америкадики чоң техника ширкәтлири өзлирини хитайниң тәсир күчигә хизмәт қилидиған печкиларға айландуруп қойди," дегән.

У алма ширкити һәққидә тохтилип: "алма ширкити хитай һөкүмитиниң сиңип киришини тосуймән дегән болса, хитай базирида сетилмиған болатти; демәк, америка техника ширкәтлири қош өлчәм қоллиниватиду," дегән.

Униң билдүрүшичә, хитай һөкүмити шяңгаңда "дөләт хәвпсизлики қануни" ни йолға қойғандин кейин фейсбок, гогол, тивиттер, линкедин қатарлиқ ширкәтләр хитай һөкүмитигә абонтларниң санлиқ мәлуматлирини тәминләп бәрмәйдиғанлиқини елан қилған. У бу ширкәтләрни тәқдирләп: "әгәр улар бир сәптә мәһкәм туралиса, башқа америка ширкәтлириниң хитай компартийәсиниң чириклики вә мустәбит һөкүмранлиқиға тақабил турушта яхши үлгә болуп берәләйду," дегән.

Вилям барниң юқириқидәк әйибләшлири президент трамп һөкүмити 11-айдики сайламда ғәлибә қазиниш үчүн һәрикәт башлиғандин буян хитайға қилған әң йеңи һуҗуми һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт