Amérika edliye ministiri xitay bilen hemkarlashqan holliwod we amérikadiki chong shirketlerni eyiblidi

Ixtiyariy muxbirimiz jewlan
2020-07-17
Élxet
Pikir
Share
Print
Amérika edliye ministiri wilyam bar (William Barr ) ependi aqsarayda soz qilmaqta. 2020-Yili 15-iyul, washin'gton.
Amérika edliye ministiri wilyam bar (William Barr ) ependi aqsarayda soz qilmaqta. 2020-Yili 15-iyul, washin'gton.
AP

Roytrés agéntliqining 16-iyul bergen xewiridin melum bolushiche, amérika edliye ministiri wilyam bar (William Barr) 16-iyul küni grald ford prézidént muzéyida qilghan sözide walt disnéyni öz ichige alghan holliwod shirketlirini, shundaqla alma, gogul, mikrosoft qatarliq chong shirketlerni xitay bilen hemkarlashqanliqi üchün eyibligen.

Wilyam bar mundaq dégen: "Gogol, mikrosoft, alma qatarliq shirketler xitay kompartiyesi bilen bekmu hemkarlashqusi barliqini namayan qilip keldi. Holliwodmu ularning bésimigha bash égip, xitay kompartiyesige yaxshichaq bolush üchün özining kinolirinimu tekshürüshtin ötküzidighan boldi".

U amérika shirketlirining ghayet zor xitay bazirigha kirish üchün her qandaq tedbir qollinishqa razi ikenlikini eyblep: "Xitay kompartiyesi nechche on yilliq, nechche yüz yilliq pilan tüzidu, halbuki, biz peqet pesillik kirim doklatigha köngül bölimiz. Amérikadiki chong téxnika shirketliri özlirini xitayning tesir küchige xizmet qilidighan péchkilargha aylandurup qoydi," dégen.

U alma shirkiti heqqide toxtilip: "Alma shirkiti xitay hökümitining singip kirishini tosuymen dégen bolsa, xitay bazirida sétilmighan bolatti؛ démek, amérika téxnika shirketliri qosh ölchem qolliniwatidu," dégen.

Uning bildürüshiche, xitay hökümiti shyanggangda "Dölet xewpsizliki qanuni" ni yolgha qoyghandin kéyin féysbok, gogol, tiwittér, linkédin qatarliq shirketler xitay hökümitige abontlarning sanliq melumatlirini teminlep bermeydighanliqini élan qilghan. U bu shirketlerni teqdirlep: "Eger ular bir septe mehkem turalisa, bashqa amérika shirketlirining xitay kompartiyesining chirikliki we mustebit hökümranliqigha taqabil turushta yaxshi ülge bolup béreleydu," dégen.

Wilyam barning yuqiriqidek eyibleshliri prézidént tramp hökümiti 11-aydiki saylamda ghelibe qazinish üchün heriket bashlighandin buyan xitaygha qilghan eng yéngi hujumi hésablinidiken.

Toluq bet