Xitay hökümiti iqtisadtiki astilashqa qarshi yéngi tedbirlerni élan qildi

Aldinqi küni xitay iqtisadi heqqide élan qilin'ghan statistikiliq reqemlerdin xitayda iqtisadning éshish sür'itining astilap barghanliqi melum bolghan idi.

Bügün xitay hökümiti bu heqtiki endishilerni bikar qilish meqsitide éksporttiki bajni töwenlitish we bir türküm séliq we resmiyetlerni bikar qilishqa oxshash tedbirlerni élan qildi.

B b s ning xewer qilishiche, xitay hökümiti memliket ichidiki axbarat wasitiliride iqtisadtiki astilashning normalliqini ilgiri sürüp, buni iqtisadning örlep melum sewiyige yetkenlikining ipadisi, dégen. Emma xelq'ara hsbch bankisi charshenbe küni élan qilghan doklatida, xitay iqtisadining éshish sür'itidiki töwenleshni amérika we yawropa bazirida xitay mallirigha bolghan telepning aziyishi we shundaqla xitay da'irilirining ichki bazarni janlanduralmasliqi bilen munasiwetlik, dep körsetken.

Iqtisadshunaslar xitay iqtisadining éshish sür'itidiki bu astilashning yene dawam qilidighanliqini mölcherlimekte. Ular, xitay hökümitini muqim iqtisadiy tereqqiyatqa érishish üchün choqum tüptin islahat élip bérish we éksportqila tayinip qélishtek ehwalgha xatime bérish, ichki bazarni janlandurup, xitay puqralirining istémal sewiyisini ashurush heqqide köp qétim agahlandurghan. Emma b b s ning éytishiche, xitay hökümiti bügün élan qilghan tedbirler peqet kichik we ottura tiptiki karxanilarning iqtisadtiki astilashtin az ziyan körüshigila kapaletlik qilalaydiken.