Ли кечяң хитайниң иқтисадий саһәдә давалғушқа дуч келиватқанлиқини етирап қилди

Мухбиримиз шөһрәт һошур
2018-09-19
Share

Хитай баш министири ли кечяң хитайниң нөвәттә иқтисадий саһәдә давалғушқа дуч келиватқанлиқини тилға алған.

У бу сөзләрни бүгүн йәни 19-сентәбир күни тйәнҗиндә ечилған дуня иқтисад мунбири йиғинида оттуриға қойған.

У сөзидә хитай иқтисади дуня иқтисадий билән көп җәһәттин бир-биригә бағлинишлиқ болғачқа, дуняниң иқтисадий вәзийитидә йүз бериватқан өзгиришләрниң тәсиригә учримай қалмайдиғанлиқини илгири сүргән. У йәнә мушу сәвәбтин хитайдики иқтисадий тәрәққиятни муқим сүрәттә елип меңишта бир қатар зор қийинчилиқларға дуч келиватқанлиқини етирап қилған.

Америкиниң CNBC телевизийәсиниң бүгүнки бу һәқтики хәвиридә әскәртилишичә, хитайниң мәмликәтлик иқтисадий бихәтәрлик комитетиниң әмәлдарлиридин фаң шиңхәй шу йиғинда сәйшәнбә күни қилған сөзидә америкиниң иқтисадий тәдбирлириниң хитайға тәсир көрситәлмәйдиғанлиқини баян қилған икән.

Хәвәрдин мәлум болушичә, хитай баш министири ли кечяң бүгүнки сөзидә хитайниң иқтисадий җәһәттики давалғуш аламәтлирини етирап қилған болсиму, әмма арқидин йәнә хитайниң бу давалғуштин раһәтсиз әмәсликини, хитайниң йүз бәргүси һәр хил еһтималлиқларға қарита тәйярлиқ тәдбирлири барлиқини баян қилған.

Хәлқара хәвәрләрдә дейилишичә, америка президенти доналд трамп алдинқи күни хитайниң 200 милярд доллар қиммитидики мелиға қоюлидиған чегра беҗини өстүридиғанлиқини елан қилғандин кейин, хитай тәрәп буниңға җавабән америкиниң 60 милярд долларлиқ мелиға чегра беҗини өстүридиғанлиқини елан қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.