Xitay hökümiti iranda "Shinjang medeniyet heptiliki" ötküzmektiken

Muxbirimiz qutlan
2016-08-27
Élxet
Pikir
Share
Print

Xitay hökümiti 22 - awghuttin bashlap iran islam jumhuriyitining paytexti téhrandiki ni'awaran medeniyet merkizide "Shinjang medeniyet heptiliki" ötküzmektiken.

Mezkur pa'aliyetke "2016 - Yilida junggoning irandiki kechürmishliri" dep nam bérilgen bolup, uningda asasliqi Uyghur aptonom rayonidin teshkillen'gen sen'et ömiki téhranda birqanche meydan oyun qoyidiken. Shuning bilen bir waqitta yene Uyghur aptonom rayonigha da'ir foto süret körgezmisimu ötküzülidiken.

Shinxwa agéntliqining bu heqtiki xewirige qarighanda échilish murasimigha 500 din artuq iran hökümet emeldarliri, chet'el diplomatliri, xitayning irandiki karxana wekilliri we oqughuchilarning qatnashqanliqi melum.

Xitay memliketlik siyasiy kéngeshning re'isi yü jéngshéng téhran'gha ewetken tebrik télégrammisda: "Mezkur heptilik iran xelqining shinjangdiki inaq jem'iyetni chüshinishini hemde bu yerdiki iqtisadiy tereqqiyatni hés qilishini ilgiri süridu," dégen.

Igilinishiche, xitayning iran bilen bolghan istératégiyelik hemkarliqi yillardin buyan dawamliship kéliwatqan bolup, iran tarixtin buyan Uyghur éli bilen qoyuq medeniyet munasiwitige ige bolushigha qarimay, Uyghur mesiliside izchil halda xitayni qollap kelmekte. Közetküchiler, yéqinqi yillardin buyan xitayning Uyghur élida shi'e mezhipidikilerge yéshil chiraq yéqip beriwatqanliqini, hetta bir qisim Uyghur diniy zatlirini iran'gha ewetip oqutiwatqanliqini ilgiri sürmekte.

Toluq bet