Xitay j x ministiri özbékistan ziyaritide “Térrorluq we ashqunluqqa qarshi turush” ta hemkarlishishni telep qilghan

Xitay bilen ottura asiya döletliri otturisidiki iqtisadiy hemkarliq we bashqa munasiwetler jiddiy küchiyiwatqan bir peytte, xitay jama'et xewpsizlik ministiri wang shyawxung özbékistanni ziyaret qilghan.

“Tashkent waqti” gézitining xewiridin qarighanda, tashkentte xitay j x ministiri wang shyawxungni özbékistan pirézidénti shewket mirziyayéf qobul qilghan. Wang shyawxung 2-aprél küni özbékistanning ichki ishlar ministiri pulat babajanof bilen körüshken. Ular “Térrorluq we ashqunluqqa qarshi turush, zeherlik chékimlik etkeschiliki we bashqa dölet halqighan teshkillik jinayetlerge qarshi turushta hemkarliqni kücheytish” heqqide muzakire élip barghan.

Özbékistan ichki ishlar ministirliqi axbarat orginining bayanatida, ikki döletning öz ara tejribe almashturush, xadimlarni terbiyelesh we ikki tereplik ziyaretlerni élip bérish jehetlerde kélishish hasil qilghanliqi؛ shundaqla xitay j x ministirliqi bilen özbékistan ichki ishlar ministirliqi otturisida 2024-2025-yilliridiki hemkarliq pirogrammisining imzalan'ghanliqi bayan qilin'ghan.

Aldinqi hepte Uyghur rayonining re'isi erkin tuniyaz bashchiliqidiki bir ömek ottura asiyadiki özbékistan we qirghizistan qatarliq döletlerni ziyaret qilip, ikki terep otturisida her sahe hemkarliqni kücheytish heqqide kélishken idi.

Mol énérgiye zapisigha ige ottura asiya rayoni xitayning “Bir belbagh bir yol” qurulushini ongushluq élip bérishtiki yadroluq rayon'gha aylan'ghan bolup, xitay da'iriliri ottura asiya döletliri bilen diplomatiye, iqtisad, soda-tijaret we gé'o-siyasiy jehetlerdiki munasiwetlirini kücheytishke alahide ehmiyet bermektiken.

Uyghur aptonom rayonluq partkom da'imiy komitétining 4-aprél küni achqan yighinidimu bu mesile tekitlen'gen bolup, ma shingrüy yighinda “Etraptiki döletler bilen öz'ara alaqe we ziyaretlerni qanat yaydurush, almashturush netijilirini sijil mustehkemlesh, shundaqla xitayning dawamliq gherbke qarap échilish we kéngiyishtek dölet istratégiyesini yenimu tézlitish” ni tekitligen.

Xitay hökümitining ottura asiyadiki pa'aliyetlirini kücheytishi Uyghur pa'aliyetchilerni endishilendürmekte. Qazaqistandiki Uyghur siyasiy pa'aliyetchi qehriman ghojamberdi ependi radiyomizgha qilghan sözide, xitay hökümitining iqtisad arqiliq ottura asiya döletlirini özining arqa hoylisigha aylandurushqa urunuwatqanliqini bildürgen.