Xitayning amérikadiki jasusluq pa'aliyiti we chégra halqighan basturushi téximu kücheygen

Amérika awam palatasining élan qilghan eng yéngi doklatida körsitishiche, xitayning amérikadiki jasusluq pa'aliyiti we öktichilerni nishan qilghan chégra halqighan basturushi dawamliq kücheygen. Doklatta, bu délolarning béyjinggha nazuk herbiy uchurlarni yetküzüsh, soda mexpiyetlikini oghrilash, xitay öktichilirige parakendichilik qilish, adaletke tosqunluq qilish qilmishlargha chétilghanliqi qeyt qilinmaqta.

Amérika awam palatasi ana weten xewpsizliki komitétining térrorluq, qanun ijra'ati we istixbarat töwen komitéti teripidin élan qilin'ghan doklatta bildürüshiche, amérika fédératsiye da'iriliri 2021-yili 1-aydin bu yil 10-ayghiche bolghan ariliqta, amérikaning 20 ishtatidiki xitaygha munasiwetlik jasusluq weqeliridin 55 déloni bir terep qilghan.

Doklatta mundaq déyilgen: “Xitay hökümiti we xitay kompartiyesi amérikaning iqtisadiy bixeterliki, ana weten xewpsizliki we démokratik qimmet ölchimige jiddiy tehdit salmaqta. Xitay puqraliri we xitay puqrasi bolmighan, emma xitay xelq jumhuriyitige ishleydighan shexslerning her xil jasusluq heriketliri, jümlidin hökümet, herbiy we iqtisadiy jasusluqni öz ichige alghan, emma buning bilen cheklinip qalmaydighan jasusluq heriketliri pütün memliket miqyasida téz kéngeymekte.”

Doklatta qeyt qilinishiche, 2000-yilidin 2023-yilghiche bolghan ariliqta, xitayning amérikagha qarshi 224 jasusluq weqesi bayqalghan bolup, buning 80 pirsenti xitaygha paydiliq iqtisadiy jasusluq délosi iken. Doklatta, buning 60 pirsentining xitay jasusliri teripidin élip bérilghan soda mexpiyetlikini oghrilashqa chétishliq jasusluq heriketliri ikenliki bildürülmekte. Doklatta, xitayning amérikadin oghrilighan eqliy mülük sommisining qimmiti milyardlighan dollargha yétidighanliqi, buning her bir amérika a'ilisige élip kélidighan iqtisadiy yükining 4 ming dollardin 6 ming dollargha qeder bolidighanliqi körsitilgen. Doklatta yene xitayning chégra halqighan basturushi heqqide toxtilip, xitay hökümiti chégra sirtidiki öktichilerni yoshurun yaki ashkara basturushning eng chong menbesi ikenliki tekitlen'gen.