Антони билинкен әпәнди хитай һөкүмитиниң җаза тәдбирини әйиблиди

Хитай һөкүмити 2021-йили 21-декабирда америка хәлқара диний әркинлик комитетиниң рәис вә муавин рәислирини өз ичигә алған төт нәпәр әзасиға җаза елан қилғаниди. Хәлқара җәмийәт

Бирдәк “хитай һөкүмитиниң өктәмләрчә өч елиш һәрикити” дәп әйибләватқан бу қилмишини 11-январ күни америка ташқи ишлар министири антони билинкен әпәндиму кәскин тәнқидлиди.

Америка ташқи ишлар министирлиқиниң тор бетидә 10-январ күни елан қилинған бу һәқтики баянатта нейдин меанза, нури түркәл қатарлиқ төт нәпәр комиссарға хитай һөкүмити елан қилған җазаниң әмәлийәттә хитай һөкүмити садир қиливатқан йәнә бир түрлүк қәбиһлик икәнлики алаһидә тәкитлиниду. Ташқи ишлар министири антони билинкен бу һәқтә тохтилип: “хитай һөкүмити буниңдин илгириму америка хәлқара диний әркинлик комитетиниң үч нәпәр комиссариға, шуниңдәк америка туприқида вә башқа җайларда демократийә вә кишилик һоқуқ мәсилилири үчүн күрәш қиливатқан көплигән кишиләргә һечнемидин һечнемә йоқла җаза елан қилди. Биз буниңдин қорқуп қалмаймиз, шундақла җазаға учриған ашу кишиләр билән бир сәптә туримиз” дегән.

У баянатниң ахирида бейҗиң даирилириниң уйғур дияридики қирғинчилиқ вә инсанийәткә қарши җинайәтләрни паш қилғучиларниң ағзини юмдуруш һәмдә уларни қорқутуш үчүн қолланған бу хил қилмиши маһийәттә хәлқараниң диққитини бу районға техиму бәкрәк мәркәзләштүрүш ролини ойнайдиғанлиқини алаһидә тәкитләйду. Шуниңдәк америка һөкүмитиниң һәрқачан бу хил қилмишни, җүмлидин америка туприқидики уйғур паалийәтчиләрниң вә америка хәлқигә мулазимәт қиливатқан шәхсләрниң уруқ-туғқанлирини түрмигә қамаштәк ишларни әйибләйдиғанлиқини алаһидә тәкитләйду.

Буниңдин илгириму америка авам палатасиниң рәиси нәнсий пелоси ханим хитай һөкүмитиниң америка хәлқара диний әркинлик комитетиниң төт нәпәр әзасиға җаза елан қилишини әйибләп: “хитайниң бу хил терә тарақшитишлири бизни қорқуталмайду. Биз һәрқачан адаләтни һимайә қилғучилар билән бир сәптә туримиз” дегән, шуниңдәк хитай һөкүмитиниң нөвәттә қиливатқанлириниң ашкара қирғинчилиқ икәнликини тәкитлигәниди.