Америка һөкүмити хитайниң хиюстондики консулханисини 72 саәт ичидә тақашқа буйруди

Мухбиримиз нуриман
2020-07-22
Елхәт
Пикир
Share
Принт

«Ню-йорк вақти» гезитиниң 22-июл бәргән хәвиригә асасланғанда америка һөкүмити хитайниң хиюстондики баш консулханисини җасуслуқ қилиш вә әқлий мүлүк оғрилашқа урунғанлиқи сәвәблик 72-саәт ичидә тақашқа буйруған.

Америка ташқи ишлар министири майк помпейо 22-июл данийәниң копенһаген шәһиридә өткүзүлгән мухбирларни күтүвелиш йиғинида бу һәқтә мундақ деди: «хитай пуқралириниң америкада әқлий мүлүк һоқуқини оғрилиши изчил мәсилә болуп кәлди. Биз хитай компартийәсигә пурсәт бәрдуқ. Улар һәрикитини тохтатмиди. Биз әмди америка пуқралирини, дөләт бихәтәрликимизни вә иқтисадимизни қоғдайдиған һәрикәткә өтимиз».

Америка ташқи ишлар министирлиқиму бу һәқтә мәхсус баянат бәргән болуп, баянатта мундақ дейилгән: «бу қетимлиқ тақаш хитайниң американиң игилик һоқуқиға қайта-қайта хилаплиқ қилғанлиқиға, йәни униң ‹изчил җасуслуқ вә тәсир көрситиш һәрикити'гә қайтурулған җаваб».

Америка ташқи ишлар министирлиқи баянатчиси морган ортагус американиң чиқарған бу қарариниң хәлқара қанунға уйғун икәнликини тәкитләп мундақ деди: «вйена әһдинамисидә дипломатларниң ‹қобул қилғучи дөләтниң қанун-низамлириға һөрмәт қилиш вә у дөләтниң ички ишлириға арилашмаслиқ мәҗбурийити бар' дейилгән. Лекин хитай изчил җасуслуқ қилиш вә американиң сиясәтлиригә тәсир көрситишкә урунуп кәлди. Ташқи ишлар министири помпейо, федератсийә тәкшүрүш идарисиниң башлиқи врай вә баш тәптиш барр ейтқандәк, хитай әмәлдарлири дөлитимизниң сияситигә арилашти, американиң әқлий мүлүк һоқуқини оғрилиди, хитайда яшайдиған хитай америкалиқларниң аилә-тавабиатлириға тәһдит салди. Шуңа америка һөкүмити хитайниң хиюстондики баш консулханисини тақаш буйруқини бәрди».

Йеқинда америка һөкүмитиниң хитай компартийәси әзалири вә уларниң аилә-тавабиатлириниң америкаға киришини чәкләшни ойлишиватқанлиқи оттуриға чиққаниди.

Пикирләр (0)
Share
Толуқ бәт