Xitay nopusining izchil kémiyishi dunyaning diqqitide bolmaqta

Xitay döletlik istatistika idarisi 17-yanwar élan qilghan eng yéngi sanliq melumatlarda körsitilishiche, 2023-yilining axirida xitay nopusi 1 milyard 490 milyon bolup, aldinqi yilgha sélishturghanda ikki milyondin köprek nopus kémeygen. Bu san ötken yilning oxshash mezgilidiki istatiskidinmu töwen bolghan.

Radiyomiz xitayche bölümining bu heqtiki xewiride éytilishiche, xitayda aldinqi yilidiki tughulush nisbiti 6.39 Pirsent bolghan hemde xitay xelq jumhuriyiti qurulghandin buyanqi tughulush nisbitide eng töwen rékordni yaratqan. Ölüm nisbiti bolsa 7.87 Pirsent bolup, bu san uda üch yildin buyan örlep mangmaqta iken. Bu boyiche hésablighanda, xitay nopusining tebi'iy köpiyish nisbiti minus 1.48 Pirsent bolghan hemde aldinqi yildiki oxshash mezgilge sélishturghanda téximu éghirlashqan.

Melum bolushiche, xitay nopusining yash qurulmisida 16 yashtin 59 yashqiche bolghan emgek yéshidiki nopus pütkül xitay nopusining 61.3 Pirsentini teshkil qilidiken. Bu san aldinqi yildikige sélishturghanda, on milyon kishi azayghan. 60 Yashtin ashqanlar we 65 yashning yuqirisidikiler ayrim-ayrim halda 21.1 Pirsent we 15.4 Pirsent bolup, nopustiki yashan'ghanlarning nisbiti 2022-yilidikidin téximu ashqan.

Nöwette xitay nopusida körülüwatqan bu xil töwenlesh yüzlinishi we u keltürüp chiqiridighan türlük ijtima'iy mesililer herqaysi axbarat wasitiliridin keng yer almaqta.