Уйғур аптоном райони ичкиридин кәлгән T307 номурлуқ пойиздики хитайларниң өзини мәлум қилишини тәләп қилди

Мухбиримиз әркин
2020-01-27
Share

Уйғур аптоном райони даирилири 26‏-январ күни уқтуруш чиқирип, 19‏-январ күни вухәнниң вучаң пойиз бекитидә T307 номурлуқ йолучилар пойизиниң 8‏-вагонида олтуруп уйғур райониға чиққан хитайларниң дәрһал өзини мәлум қилишини тәләп қилған.

Хитай һөкүмити «вухән вируси» ни 31‏-декабир күни дуня сәһийә тәшкилатиға мәлум қилған болсиму, лекин уйғур аптоном райони даирилириниң вухәндин йолға чиққан йолучилар пойизиға қарита бихәтәрлик тәдбирлирини алмиғанлиқи мәлум әмәс.

Мәлум болушичә, 19‏-январ күни вухәнниң вучаң пойиз бекитидә T307 номурлуқ йолучилар пойизиниң 8‏-вагониға чиқип, 20‏-январ гәнсудики лоңши бекитидә чүшүп қалған бир хитай йолучиниң «вухән вируси» да юқумланғанлиқи байқалған. «Үрүмчи кәчлик гезити» ниң хәвәр қилишичә, нөвәттә үрүмчи шәһәрлик йеңи типтики өпкә яллуғи вирусидин мудапиә көрүш қоманданлиқ штаби T307‏ номурлуқ йолучилар пойизиниң 8‏-номурлуқ вагонида үрүмчигә кәлгән йолучиларниң дәрһал өзи турушлуқ орунлардики аһалиләр комитети, идарә яки меһманхана даирилиригә өзини мәлум қилиши яки 12345 номурға телефон қилип, өзини тизимға алдурушини тәләп қилған. Уқтурушта йәнә бу кишиләрниң талаға чиқмаслиқи, аилидә карантинға елиниши, әгәр нормалсиз әһвал көрүлсә дәрһал бәлгиләнгән давалаш орниға бериши тәләп қилинған.

Хитай һөкүмити өткән һәптә вухән шәһирини қамал қилип, униңға кириш-чиқишни чәклигән болсиму, хәвәрләрдә 11 милйонлуқ вухән шәһиридики 5 милйон кишиниң бу шәһәрдин чиқип кәткәнлики илгири сүрүлмәктә. Нөвәттә, бу кишиләрниң қайси өлкә, районларға тарқалғанлиқи мәлум әмәс икән. «Тәңритағ» ториниң 27‏-январ хәвәр қилишичә, даириләр 26‏-январға қәдәр уйғур райони миқясида 5 кишиниң «вухән вируси» билән юқумланғанлиқи, уларниң 4 ниң үрүмчидә, бириниң или областида икәнликини билдүргән. Бәзи мутәхәссисләр вирусниң маһийити сәвәблик униң кәлгүси бир қанчә һәптидә партлаш характерлик көпийиши мумкинликини пәрәз қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт