Xitay-qirghizistan-özbékistan tömüryol liniyesi pilan qilin'ghan

Xewerlerge qarighanda Uyghur élining qeshqer shehiridin bashlinip xitay, qirghizistan we özbékistanlarni bir birige tutashturidighan bir tömüryol liniyesini yasash pilan qilin'ghan.

“Ézer xewerliri tori” ning xewer qilishiche, 3 terep hey'etliri 27-dékabir özbékistan paytexti tashkent shehiride uchriship, mezkur mesile üstide sözleshken we pikir birliki hasil qilghan. 

Xewerde qirghizistanning özbékistanda turushluq bash elchisi daniyar sidiqofining éytqanliridin neqil élip körsitishiche, mezkur poyiz liniyisi bésip ötidighan rayonlarning tepsilati kéler yili aprélghiche teyyarlinidiken. 

Xewerge qarighanda, üch terep wekilliri söhbet jeryanida yene mezkur liniye qurulushining mumkinchilik tetqiqati heqqidiki hasilatlarni 2018-yili awghustqiche teyyarlash, qurulushning meblegh mesilisini hel qilish chariliri 2018-yilining axirighiche otturigha qoyushqa kélishken. 

Xewerde omumiy uzunluqi 450 kilométirdin 500 kilométirghiche bolghan mezkur tömüryol liniyisining qirghizistan we özbékistanning xitay bilen bolghan soda alaqisini ilgiri süridighanliqi körsitilgen. 

Halbuki ilgiri bu heqte élan ilin'ghan bezi xewerlerde qirghizistan xitay bilen bolghan tashqi sodida xitaydin köplep mal import qilghan bolsimu, xitaygha mal éksport qilishqa qiyinchiliqqa yoluqqanliqi ilgiri sürülgen.

Ilgiri xitay otturigha qoyghan atalmish “Bir belwagh bir yol istratégiyisi” ning yene bir yölinishining Uyghur élidin bashlinip qirghizistan, ezerbeyjan we türkiye arqiliq yawropagha ulinidighanliqi ilgiri sürülgen. 

Bu nöwet pilan qilin'ghan bu tömüryol liniyisining “Bir belwagh bir yol istratégiyisi” ning bir parchisi yaki emesliki hazirche namelum.