Xitay saqchiliri "Térrorluq guruppisi" gha chétishliq 3 neper Uyghur gumandarni étip öltürgenlikini bildürgen

Muxbirimiz qutlan
2017-01-09
Élxet
Pikir
Share
Print

Xitay saqchi terep 8-yanwar küni kechqurun xotende "Térrorluq guruppisi" gha chétishliq 3 neper gumandarni qoghlap tutush jeryanida étip öltürgenlikini bildürgen.

Tengritagh tori bilen xelq torida bérilgen bu heqtiki qisqa xewerde mundaq déyilgen: "2017-Yili 1-ayning 8-küni kech sa'et sekkizdin ashqanda, xoten jama'et xewpsizlik orgini 2015-yili guma nahiyeside yüz bergen '22-aprél weqesi' ni sadir qilghan térrorluq shaykisidin üch nepirini étip öltürgen. Saqchilar qachqunni qoghlap tutuwatqanda, ular zorawanliq bilen qarshiliq körsetkechke, neq meydanda étip tashlan'ghan. Saqchilardin qaza qilghanlar we yarilan'ghanlar bolmighan".

Halbuki, xitay hökümet taratquliri mezkur xewerde tilgha alghan 2015-yilidiki guma nahiyeside yüz bergen "22-Aprél weqesi" hazirghiche tashqi dunyagha melum bolmighan bir weqe bolup, xitay terep öz waqtida bu heqte héchqandaq xewer bermigen.

Xitay saqchi terepning 8-aprél küni xotende étip öltürgen 3 neper gumandarning kimliki we ularning qandaq sewebler bilen 2015-yilida gumida yüz bergen atalmish "22-Aprél weqesi" ge chétishliq ikenliki heqqide tepsiliy melumat bermesliki xelq'aradiki jama'etchilikning gumanini qozghimaqta. Közetküchiler, mezkur weqe xitay da'irilirining Uyghur élida ijra qiliwatqan aldi bilen gumandarlarni neq meydanda étip öltürüp, andin weqe heqqide izahat bérish usulining bir misalidur, dep qarimaqta.

Toluq bet