2016-Yili Uyghur élining peyziwat nahiyisi shaptul bazirida bir Uyghur déhqanni urup öltürüwetken xitay saqchigha 7 yilliq qamaq jazasi bérilgen.
Peyziwat nahiyelik sot mehkimisining hökümnamiside qeyt qilinishiche, mehkime mezkur xitay saqchini qesten nabut qilish bilen eyibligen bolsimu, biraq uning jinayitini tonup, towa qilishi yaxshi bolghachqa we ziyankeshlikke uchrighuchining a'ilisining epu qilishigha érishkechke uninggha yéniklitip jaza bérilgen.
Mezkur weqe 2016-yili 5-ayning 28-küni shaptul baziridiki bir tekshürüsh ponkitida yüz bergen. Shu küni peyziwat nahiyesining turghuni obulqasim mamut 3 chaqliq motsiklitini heydep tekshürüsh ponkitidin ötüwatqanda uning motsiklitining arqisidiki polat chiwiq tekshürüsh ponkitining wadikige ilinip qalghan. Buningdin qattiq térikken tekshürüsh ponkitining mes'uli, peyziwat nahiyelik j x idarisi alahide saqchi etritining bashliqi jin shingtong obulqasim mamutni toxtitip qattiq urghan. Obulqasim mamut tayaq zerbiside shu zamat ölgen.
Nahiyelik teptish mehkimisi jin shingtongni weqedin 6 ay kéyin qolgha alghan. Teptish mehkimisining jin shingtongni néme üchün 6 aydin kéyin qolgha alghanliqi melum emes.
Uyghur aptonom rayonida bir xitay saqchining qesten adem nabut qilish bilen eyiblinip qamaq jazasigha höküm qilinishi az uchraydighan hadise.
Közetküchilerning bildürüshiche, Uyghur rayonida saqchilarning Uyghurlarni naheq öltürüsh weqeliri köp yüz bersimu, biraq xitay hökümiti bu xil weqelerge siyasiy nuqtidin mu'amile qilip nurghun weqelerni yoshuridiken.
Xitay hökümiti 2009-yili "5-Iyul weqesi" din kéyin xitay amanliq küchlirige téximu zor hoquq bérip, ularning Uyghurlargha xalighanche oq chiqirishi yaki zorawanliq wasitilirini téximu dadil qollinishigha keng yol échip bergen. Bu xelq'ara kishilik hoquq we chet'eldiki Uyghur teshkilatning izchil tenqidige uchrap kelgen. Ular buning Uyghur rayonida nurghun qanliq paji'elerge seweb boluwatqanliqini agahlandurup kelgen idi.
