Uyghurlarni basturushqa hemkarlashqan xitay shirkitining awstraliyede térilghu yer sétiwalghanliqi ashkarilandi

Muxbirimiz erkin
2020-02-10
Élxet
Pikir
Share
Print

Awstraliyede yer sétiwélip, déhqanchiliq qilmaqchi bolghan xitay yéza igilik shirkitining Uyghur rayonidiki basturushqa yardemleshkenliki ashkarilandi. Awstraliye axbarat agéntliqi ABC ning xewer qilishiche, awstraliyede yer sétiwélip, paxta ishlepchiqarmaqchi bolghan "Shinjang yikang yéza igilik shirkiti" xitayning Uyghurlargha qarita élip barghan "Ménge yuyush" programmisigha ishtirak qilghan iken.

"Shinjang yikang yéza igilik shirkiti" ning tijariti 2001‏-yili shayar nahiyelik uruqchiliq idarisining yaghliq ximiyewi ösümlükler ponkitini sétiwélish bilen bashlinip, yéqinqi 20 yilda rayondiki eng chong shexsiy yéza igilik shirketlirining birige aylan'ghanidi. ABC Ning bildürüshiche, mezkur shirketning xojayini xu shawlün 2016‏-yili awstraliyening shimaliy térritoriyesidiki bir charwichiliq meydanini sétiwalghan. U, mezkur charwichiliq meydanining 5000 géktar yérige paxta térishni pilanlap sétiwalghan bolsimu, lékin su mesilisini hel qilalmay uning pilani hazirghiche emelge ashmighan. Xewerde bayan qilinishiche, xu shawlün ilgiri Uyghur aptonom rayonidiki bir yézigha ewetilgen xizmet etritige qatniship, ularning Uyghur a'ililirini yoqlishigha ishtirak qilghan, shundaqla siyasiy nutuq sözligen iken.

Xewerde, bu xil pa'aliyetning kishilik hoquqni közitish teshkilatining tenqidige uchrap kelgenliki, uning bu pa'aliyet xelqni nazaret qilishni meqset qilghan, dep qaraydighanliqi tekitlen'gen. Xewerde yene xu shawlünning noqul siyasiy teshwiqat pa'aliyetlirige qatniship qalmighanliqi, uning yene xitay hökümitining teshkillishidiki atalmish namratliqni azaytish heriketlirige qatniship, namrat ahalilerni ishqa alghanliqigha da'ir xewerler élan qilin'ghanliqi, halbuki bu xil ishqa orunlashturushlarning mutexessislerde we kishilik hoquq teshkilatlirida guman qozghap kelgenliki tekitlen'gen. Xewerde qeyt qilinishiche, mezkur shirket muxbirining bu mesile heqqidiki so'aligha jawab bérishni ret qilghan.

Toluq bet