Хитайниң нурғун мода ширкәтлири американиң “шинҗаң пахтиси” ни чәклигәнликидин хәвири йоқлирини ейтқан

Мухбиримиз әркин
2022.07.08
Share on WhatsApp
Share on WhatsApp

Америкадики “вог сода тәминләш зәнҗири” намлиқ мода кийим тор бекитиниң ашкарлишичә, хитайдики нурғун мода кийим ширкәтлири американиң қанун чиқирип “шинҗаң пахтиси” ни чәклигәнликидин хәвири йоқлиқини ейтқан. Бу тәкшүргүчиләрдә хитай мода кийим ширкәтлири америка-хитай арисидики чоң ихтилапқа сәвәб болған вә дуняда зор тәсир қозғиған бу қанунни қәстән билмәскә селивалдиму яки униңдин раст хәвири йоқму, дигән гуманни қозғиған. “вог сода тәминләш зәнҗири” ториниң елан қилған бу һәқтики тәкшүрүш доклатида, бу әһвал америка маркилириға көрүнәрлик хәвп пәйда қилидиғанлиқини билдүргән.

Доклатта америка һөкүмити 21-июн “уйғур мәҗбури әмгикиниң ‍алдини елиш қануни” ни рәсмий ‍иҗра қилип, хилаплиқ қилғучиларға 250 миң доллар җәриманә қоюшни башлиғандин кейин, уйғур мәҗбури әмгәк мәһсулатлиридин халий болуш америка ширкәтлириниң үстигә чүшкәнлики тәкитләнгән. “вог” ниң доклатида ейтилишичә, уларниң сода гурупписи хитайдики 10 чоң мода кийим билән тәминлигүчи ширкәт билән алақилашқан болуп, улардин пәқәт иккисила американиң қанун чиқирип “шинҗаң пахтиси” ни чәклигәнликидин хәвири барлиқини ейтқан.

Хитайниң мода кийим ишләпчиқириш мәркизи болған гуаңҗудики бир ширкәт америкадики йәттә чоң херидариниң һечқайсисиниң бу чәклимини тилға ‍елип бақмиғанлиқи, өзлириниң техи өткән һәптә америкаға закас мал әвәткәнлики, бу маллар хитай пахта мәһсулатлирини өз ичигә алидиғанлиқини билдүргән. Улар алақилашқан пәқәт бир ширкәтла америкадики херидарлирини алақидар һөҗҗәтләр билән тәминләш үчүн сода мәшғулатини өзгәрткәнликини ейтқан. Доклатта мутәхәссисләрниң сөзини нәқил кәлтүрүшичә, “ширкәтләрниң бу қанунға қанчилик җиддий қариши, америка һөкүмитиниң бу қанунни қандақ тәдбиқлиши, уни қанчилик қаттиқ иҗра қилишиға бағлиқ,” икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.