Хитай бир қисим дөләтләрдики сиясий партийә, иҗтимаий тәшкилатларни үрүмчидә йиғинға чақирип, "шинҗаң сиясити" ни ақлиди

Техиму көп дөләтләрниң уйғурларға "ирқий қирғинчилиқ" йүргүзиливатқанлиқини етирап қилиш вәзийитигә дуч кәлгән хитай һөкүмити, бир қисим дөләтләрдики сиясий партийә, иҗтимаий тәшкилат, тәтқиқат орни вә ақиллар амбарлириға үрүмчидә йиғин өткүзүп, өзиниң "шинҗаңдики һәрикити" ни ақлашни күчәйткән. Хитай таратқулириниң ашкарилишичә, 22-феврал торда өткүзүлгән бу йиғинни хитай компартийәси мәркизи комитетиниң ташқи алақә бөлүми билән уйғур аптоном районлуқ партком бирлишип уюштурған.

Хитай мәркизи ташқи алақә бөлүминиң үндидарда тарқатқан бу һәқтики учурида, "җоңго компартийәсиниң шинҗаң һекайиси" дегән темидики бу тор йиғиниға 80 дәк дөләттики 200 гә йеқин чәтәл сиясий партийәси, тәтқиқат орни, иҗтимаий тәшкилат вә ақиллар амбиридин 300 дәк киши қатнашқанлиқини билдүргән. Бирақ учурда йиғинға қатнашқан бу сиясий партийә-гуруһлар, тәтқиқат орни, иҗтимаий тәшкилатларниң исми, қайси доләтләрдә икәнлики тилға елинмиған. Бу йиғинниң дәл канада парламенти 22-феврал қарар мақуллап, хитайниң уйғурларға қаратқан дәпсәндичиликини "ирқий қирғинчилиқ" дәп етирап қилған күни өткүзүлүши диққәт қозғиди.

Учурда, йиғин әһлигә уйғур аптоном районлуқ парткомниң "партийәниң йеңи дәврдики шинҗаңни башқуруш истратегийәси, мәркизий комитетниң орунлаштурушини иҗра қилиш әһвали, һәр милләт хәлқини иттипақлаштуруш, гүзәл турмушқа йетәкләштәк һәқиқи һекайиси тонуштурулғанлиқи" илгири сүрүлгән. Хитай һөкүмити өзиниң уйғур елидики сияситини ақлисиму, лекин хәлқарада униң әмәлийәттики һәрикити "ирқий қирғинчилиқ" дәп қарайдиғанлар барғансери көпәймәктә.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар