Xitaydiki dölet mudapi'e rehberlik sahesige qarita yéngi “Tazilash dolquni” qozghaldi

Xitayning dölet mudapi'e ministiri we rakéta qisimlirining qomandanlirini öz ichige alghan yuqiri derijilik herbiy rehberlirige qaritilghan “Tazilash” tin kéyin, nöwette bu xil “Tazilash herikiti” xitayning achquchluq dölet mudapi'e sana'iti sahesige kéngeygen. Shinxu'a agéntliqining 28-dékabir ashkarilishiche, xitayning achquchluq alem boshluqi we mudapi'e sana'iti sahesining üch neper rehbiri xitay memliketlik siyasiy kéngeshning ezaliqidin élip tashlan'ghan. Xewerlerde, bu xitay hökümitining herbiy sahege munasiwetlik achquchluq shexslerni tazilash herikitining bir qismi, dep körsitilmekte. Buning aldida xitayning dölet mudapi'e ministiri li shangfu we rakita qisimlirining qomandani li yüchawni öz ichige alghan 10 neper herbiy emeldarning qolgha élin'ghan yaki wezipisidin élip tashlan'ghanliqi xewer qilin'ghan idi.

 Shinxu'a agéntliqining bildürüshiche, xitay memliketlik siyasiy kéngesh bu qétim xitay alem boshluqi pen-téxnika guruhining mudiri wu yenshéng, xitay shimal sana'et guruhining mudiri lyu shichüen we xitay alem boshluqi pen-téxnika guruhining mu'awin bashliqi wang changchingni ezaliqtin élip tashlighan. Shinxu'a agéntliqi bu kishilerning néme üchün ezaliqtin élip tashlan'ghanliqigha chüshenche bermigen bolsimu, biraq xongkongdiki “Yultuzluq aral” géziti bu ücheylenning rakéta qisimlirigha chétishliq seweblerdin tekshürülüwatqanliqini éytqan. Da'iriler herbiy sahediki tazilashni chiriklikke qarshi turush herikitige baghlisimu, lékin mutexessisler bu tazilash shi jinpingning siyasiy reqiblirini yaki uning rehberlik qatlimigha tehdit, dep qaralghan shexslerni yoqitish usuli, dep körsetmekte.

 “Wal strét géziti” ning 29-dékabir xewer qilishiche, xitay déngiz armiyesining qomandani dong jün resmiy halda li shangfuning ornigha dölet mudapi'e ministiri qilip teyinlen'gen. Xitay xelq qurultiyi da'imiy komitéti bu yil 10-ayning axirlirida, ikki aydin artuq waqittin béri iz déreksiz ghayib bolghan li shangfuning wezipisidin qaldurulghanliqini élan qilghan idi.