Америка дөләт мәҗлиси кеңәш палата әзалири хитайниң тәһдитигә қаримай тәйвәнни зиярәт қилған

Мухбиримиз җәвлан
2022.04.15
Share on WhatsApp
Share on WhatsApp

Америка дөләт мәҗлиси кеңәш палата әзаси, америка дөләт мәҗлиси дипломатик мунасивәт комитетиниң рәиси боб менендиз (Bob Menendez), җумһурийәтчиләрдин болған кеңәш палата әзаси линдси граһам (Lindsey Graham) башчилиқидики дөләт мәҗлиси вәкиллири өмики 14-апрел күни тәйвәнгә келип, 2 күнлүк зияритини башлиған.

“фирансийә агентлиқи” ниң хәвиридә ейтилишичә, америка дөләт мәҗлиси вәкиллири өмики 14-апрел күни кәчтә тәйвән президенти сәй йиңвен, тәйвән ташқи ишлар министири ву җавшйе билән көрүшүп, америка-тәйвән мунасивити, район хәвпсизлики вә икки тәрәп ортақ көңүл бөлидиған муһим мәсилиләр үстидә сөһбәтләшкән.

Руйтрес агентлиқиниң 15-апрел күни бәргән хәвиригә қариғанда, хитай тәрәп америка дөләт мәҗлиси әзалириниң тәйвәнни зиярәт қилишиға қарши инкас билдүрүп, тәйвән әтрапида һәрбий маневир елип барған. Хитай һәрбий тәрәп баянатчиси җүмә күни ипадә билдүрүп: америка тәйвәнгә хата учур бериватиду, дегән.

Американиң сабиқ ташқи ишлар министири майк пампейо алдинқи айда тәйвәнни зиярәт қилғанда, тәйвәнни мустәқил бир дөләт дәп етирап қилиш керәкликини ейтип, хитай һөкүмитини ғәзәпләндүргәниди.

Анализчиларниң қаришичә, русийә украинаға һуҗум қилғандин кейин, русийәни қоллаватқан хитайниң тәйвәнгә һуҗум қилиш еһтималиниңму барлиқи америка билән тәйвән мунасивитини техиму йеқинлаштурған; америка дөләт мәҗлиси әзалириниң хитайниң тәһдитигә қаримай елип барған бу қетимлиқ зиярити американиң тәйвәнни қоғдаш ирадисини намаян қилип, хитайни агаһландуруш ролини ойнайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.