Amérika yenila xitayning amérika üchün eng chong tehdit ikenlikini bildürgen

Amérika dölet mudapiye ministiri liloyd a'ustin, rusiye uk'‍ra'inagha qarita qoralliq tajawuz qilghan bolsimu, biraq xitayning amérika üchün yenila eng chong tehdit ikenlikini bildürgen. Liloyd a'ustinning ilgiri sürüshiche, xitay xelq'ara tertipni özgertish qabiliyitige ‍ige birdin-bir dölet iken. Emma liloyd a'ustin shundaqtimu rusiyening ukra'inagha qarshi qozghighan urushi yenila “Éghir tehdit” ikenlikini éytqan.

A'ustin liloyd 27-öktebir amérikaning yéngi dölet mudapiye istiratégiyesi höjjitini élan qilish munasiwiti bilen ötküzgen axbarat yighinida mundaq dégen: “Xitay xelq'ara tertipni qayta shekillendürüsh niyitige ige we shundaq qilish qabiliyitige ige bolghan birdin-bir riqabetchidur.”

Amérikaning yéngi dölet mudapiye istiratégiyeside körsitilishiche, béyjing “Hindi-tinch okyan rayoni we xelq'ara sistémisni özining menpe'eti we istibdat urunushlirigha layiq haletke keltürüshke tirishmaqta” iken. Istiratégiye höjjitide yene xitayning teywen'ge qaritilghan “‍Ighwagerchilik pa'aliyetliri” rayonning tinchliqini buziwatqanliqi we uninggha xiris qiliwatqanliqi tekitlen'gen. Istiratégiye höjjitide yene xitay-rusiye munasiwetliri heqqide toxtilip, ikki döletning “Menpe'etliri perqliq, ular arisida ishenchisizlik mewjut” bolsimu, biraq ularning shuninggha qarimay téximu yéqinlishiwatqanliqi tekitlen'gen.

Melum bolushiche, amérika özining dölet mudapiye istiratégiyesini élan qilghan küni xitay tashqiy ishlar ministiri wang yi rusiye tashqiy ishlar ministiri lawrof bilen téléfonda sözliship, moskwani qollaydighanliqini qayta tekitligen, shundaqla rusiye prézidénti putinmu moskwadiki bir pa'aliyette teywenni xitayning bir parchisi, dep qaraydighanliqini bildürgen.