Хитайниң шейин вә темо ширкәтлирини чәкләш тәшәббуси күчәймәктә

12-Феврал, “вашигтон көзәтчиси” гезити мақалә елан қилип, хитайниң әрзан маллирини торда төкмә қилип сатидиған тему билән шейин ширкәтлирини қул әмгики сәвәбидин чәкләш керәкликини оттуриға қойған.

Торда әрзан буюмларни сатидиған тему билән мода кийим-кечәк сатидиған шейин ширкәтлириниң уйғур мәҗбурий әмгики билән бағланғанлиқи хәлқараға ашкариланған пакитларниң бири болсиму, америкада уларниң мәһсулатлирини чәкләш кәйнигә сүрүлүп келиватқаниди, трамп һөкүмити иш башлиғандин кейин, юқириқи ширкәтләрниң америкаға посулкидин мал селиш ишлириниң тәслишип қалғанлиқи мәлум болғаниди.

“вашингтон көзәтчиси” гезитидә чиққан мақалидә мундақ дейилгән: “хитайниң шейин вә тему ширкәтлири әрзан маллири вә кийим-кечәклири билән кәң қарши елишқа еришти. Әмма бу теши пал-пал, ичи ғал-ғал нәрсиләрниң кәйнидә уларниң қул әмгикидин нәп еливатқанлиқидәк бир номуссизлиқ йошурунған. Көплигән пакитлар шуни испатлидики, уларниң мал тәминләш зәнҗири шинҗаңдики уйғур мусулманлирини мәҗбурий әмгәккә селиш билән бағланған. Көплигән дөләтләр буни уйғурларға йүргүзүлүватқан ирқий қирғинчилиқниң бир қисми дәп қарайду”.

Хәвәрдә дейилишичә, трамп һөкүмити шейин билән темуни “уйғур мәҗбурий әмгикиниң алдини елиш қануни” бойичә қара тизимликкә елишни ойлишиветипту. Әгәр пирезидент трамп хитай маллиридин таможна беҗи елишта чиң туруп, американиң хитай маллириға болған беқиндилиқини азайтмақчи болса, алди билән ишни шейин билән темудин башлиши керәк икән. Чүнки бу икки ширкәтниң маллириниң америка базирини қаплаш нисбити һәммидин юқири икән. Уларниң маллирини чәкләш американиң кишилик қиммәт қаришиға уйғун һәрикәт болупла қалмай, иқтисадий җәһәттинму зөрүр тәдбир һесаблинидикән.