Xitay j x ministiri “Térorluq we bölgünchilikke qet'i zerbe béridighanliqi” heqqide jar saldi

Uyghur diyaridiki siyasiy weziyet barghanséri éghirlap méngiwatqanda pütkül xitay boyiche chaqirilghan jama'et xewpsizliki (j x) organlirining téléwizor yighinida xitay j x ministirliqining ministiri jaw kéji söz qilghan.

“Amérika awazi” ning bu heqtiki xewiride körsitilishiche, 16-aprél küni chaqirilghan bu yighinda jaw kéji “Biz türlük singip kirish we buzghunchiliq qilish herketlirige qet'i zerbe bérishimiz, zorawanliq we térorluq qilmishlirigha, milliy bölgünchilikke, diniy esebiylikke qarshi éghishmastin küresh qilishimiz lazim,” dégen. U yene bu heqtiki mesililerni “Eng deslepki bix halitidila ching tutush lazim,” dep körsetken.

Xewerde alahide qilip xitay hökümitining ötken birnechche yilda Uyghurlargha bolghan kontrolluqni hessilep kücheytkenliki, adem we mashinilarni közitish aparatliri arqiliq közitishni ishqa ashurghanliqi, qan ewrishkisi, gén ewrishkisi qatarliqlarni köplep toplawatqanliqi, bu yil bolsa ürümchi métrosida kimlik arqiliq bélet élishni yolgha qoymaqchi boluwatqanliqi bayan qilin'ghan.

Analizchilar bu heqte pikir qilip, “Xitay j x ministirining térorluq, bölgünchilik we diniy esebiylikke qarshi turimiz, dégini Uyghurlarni basturushni kücheytimiz dégenliktur. Chünki bu hadisiler izchil Uyghurlargha baghlinishliq bolup kelmekte,” dédi.