Америка ташқи ишлар министири майк помпейо хитай тәшвиқат аппаратлириниң икки йүзлимичиликини тәнқид қилди

Мухбиримиз ирадә
2020-09-10
Елхәт
Пикир
Share
Принт

Мәлум болушичә, американиң хитайда турушлуқ баш әлчиси террий брандстанд хитай компартийәсиниң орган гезити болған «хәлқ гезити» гә америка-хитай мунасивәтлири һәққидә бир парчә мақалә әвәткән. Бирақ мәзкур гезитниң тәһрир һәйити униң мақалисини елан қилишни рәт қилған.

Америка ташқи ишлар министири майк помпейо 9-сентәбир күни елан қилған бу һәқтики язма баянатида баш әлчи террий брандстандниң мақалисидә әсли икки дөләткә пайдилиқ сөзләр барлиқини, йәни америка-хитай мунасивәтлириниң иҗабий йөнилишкә тәрәққий қилиши үчүн икки дөләтниң чоқум чәклимисз муназирә қилалиши вә чәклимисиз һалда алақә орнитиши тәкитләнгәнликини ейтқан. У хитай компартийәсиниң н әң чоң канийи болған «хәлқ гезити» ниң мушунчилик бир мақалиниму елан қилалмиғанлиқини тәнқидләп, мундақ дегән:

«‹Хәлқ гезити' ниң бу һәрикити хитай компартийәсиниң пикир әркинликидин вә күчлүк әқлий муназириләрдин қанчилик дәриҗидә қорқидиғанлиқини, башқа дөләтләрдин адил муамилә тәләп қилип җедәл қилидиған бейҗиңниң қанчилик дәриҗидә икки йүзлимичи икәнликини толуқ намаян қилип бәрди.»

Майк помпейо сөзиниң давамида буниң әксичә хитай һөкүмәт әмәлдарлириниң америкадики һаятий күчкә вә ишәнчкә толған демократийәдин толуқ пайдилинип йиллардин америка хәлқи билән биваситә параңлишиш, әркин таратқулар арқилиқ өз һөкүмитиниң көз қарашлирини тарқитиш пурситидин бәһримән болуп кәлгәнликини тәкитлиди. У йәнә мундақ деди: «хитайниң америкада турушлуқ баш әлчиси сүй тйәнкәйла бу йил американиң ‹вашингтон почтиси' вә ‹сиясийон' қатарлиқ даңлиқ ахбарат орунлирида бәш парчә мақалә елан қилди һәмдә CNN вә CBS телевизийәлиригә мәхсус зиярәт бәрди. Хитай ташқи ишлар министирлиқи, хитайниң ‹йәршари вақит гезити' вә «хитай күндилик гезити» қатарлиқ дөләт иликидики тәшвиқат органлири даим твиттәр вә фачәбоок қатарлиқ американиң иҗтимаий алақә супилиридин һәқсиз пайдилинип, бизниң сияситимизгә, турмуш усулимизға вә пикир әркинликимизгә һуҗум қилип кәлди, улар башқа демократик әлләрдиму шундақ қилди.»

Майк помпейо баянатиниң ахирида хитай әгәр дуня билән сәмимий алақә орнитишни халиса, у һалда ғәрб дөләтлириниңму хитайда охшаш пурсәтләргә еришишигә капаләтлик қилиши керәкликини, америка вә башқа демократик әлләрниң һөкүмәт хадимлириниң хитай хәлқи билән биваситә учришишиға, чәт әллик мухбирларниң әркин хәвәр ишлишигә рухсәт қилип, уларға тәһдит қилишни тохтитишқа чақирған. У: «әгәр ундақ болмайдикән, бу пәқәт хитай компартийәсиниң хәлқ сайлимиған рәһбәрлириниң өз хәлқиниң әркин пикир қилишидин вә әркин дуняниң хитайниң һакимийәт йүргүзүш усулини баһалишидин нәқәдәр қорқидиғанлиқини көрситиду,» дегән.

Пикирләр (0)
Share
Толуқ бәт