Хитай уруш айропиланлириниң тәйван һава бошлуқиға кириши мунасивити билән америка хитай һөкүмитини агаһландурди

Америка хитай уруш айрупиланлириниң тәйвән һава бошлуқиға кириши мунасивити хитайни агаһландуруп, тәйвәнгә тәһдит селишни тохтитишни тәләп қилған, шуниңдәк “теодор розвелт” намлиқ авияматкисини тәйвән боғузи арқилиқ җәнубий деңизға әвәткән.

Тәйвән дөләт мудапийә министирлиқи 23-вә 24-январ кунлири арқа-арқидин он нәччә хитай уруш айрупиланиниң тәйвән һава бошлуқиға үсүп киргәнлики, тәйвәнниң уруш айропиланлири вә һава мудапийә башқурулидиған бомбилирини һәрикәтләндүрүп, хитай уруш айропиланлирини тәйвән һава бошлуқидин йирақлаштурғанлиқини елан қилған иди.

Бу вәқә байден һөкүмити 20-январ вәзипә тапшурувелип арқидинла йүз бәргән. Ройтерс агентлиқиниң хәвәр қилишичә, америка ташқий ишлар министирлиқиниң баянатчиси нед прайс 23-январ баянат елан қилип, хитайни тәйвәнгә тәһдит селишни тохтитишқа чақирған. У “бейҗиңни тәйвәнгә һәрбий, дипломатик, иқтисадий бәесим ишлитишни тохтитип, тәйвәнниң демократик йоллар билән сайланған вәкиллири билән һәқиқий сөһбәт өткүзүшкә чақиримиз,” дегән. Униң тәкитлишичә, америка тәйвәнниң йетәрлик дәриҗидә өзини қоғдаш иқтидаригә еришишигә давамлиқ ярдәм қилидикән.

Буниң алдида ақсарайниң дөләт хәвпсизлик баянатчиси емили һорнә американиң тәйвәнгә бәргән вәдисиниң “таштәк мустәһкәм” икәнликини билдүргән. Хәвәрләрдә тәкитлишичә, “теодор розвелт” намлиқ авияматкиниң тәйвән боғузи арқилиқ җәнубий деңизға кириши, хитайниң тәйвән һава бошлуқиға үсүп кириши билән мунасивәтлик яки әмәслики ениқ болмисиму, әмма униң президент байден вәзипә тапшурувелип арқидинла тәйвән боғузидин өтүши хитайға берилгән күчлүк бир сигнал икән.