Xitay urush ayropilanlirining teywan hawa boshluqigha kirishi munasiwiti bilen amérika xitay hökümitini agahlandurdi

Amérika xitay urush ayrupilanlirining teywen hawa boshluqigha kirishi munasiwiti xitayni agahlandurup, teywen'ge tehdit sélishni toxtitishni telep qilghan, shuningdek “Té'odor rozwélt” namliq awiyamatkisini teywen boghuzi arqiliq jenubiy déngizgha ewetken.

Teywen dölet mudapiye ministirliqi 23-we 24-yanwar kunliri arqa-arqidin on nechche xitay urush ayrupilanining teywen hawa boshluqigha üsüp kirgenliki, teywenning urush ayropilanliri we hawa mudapiye bashqurulidighan bombilirini heriketlendürüp, xitay urush ayropilanlirini teywen hawa boshluqidin yiraqlashturghanliqini élan qilghan idi.

Bu weqe baydén hökümiti 20-yanwar wezipe tapshuruwélip arqidinla yüz bergen. Roytérs agéntliqining xewer qilishiche, amérika tashqiy ishlar ministirliqining bayanatchisi néd prays 23-yanwar bayanat élan qilip, xitayni teywen'ge tehdit sélishni toxtitishqa chaqirghan. U “Béyjingni teywen'ge herbiy, diplomatik, iqtisadiy beésim ishlitishni toxtitip, teywenning démokratik yollar bilen saylan'ghan wekilliri bilen heqiqiy söhbet ötküzüshke chaqirimiz,” dégen. Uning tekitlishiche, amérika teywenning yéterlik derijide özini qoghdash iqtidarige érishishige dawamliq yardem qilidiken.

Buning aldida aqsarayning dölet xewpsizlik bayanatchisi émili horne amérikaning teywen'ge bergen wedisining “Tashtek mustehkem” ikenlikini bildürgen. Xewerlerde tekitlishiche, “Té'odor rozwélt” namliq awiyamatkining teywen boghuzi arqiliq jenubiy déngizgha kirishi, xitayning teywen hawa boshluqigha üsüp kirishi bilen munasiwetlik yaki emesliki éniq bolmisimu, emma uning prézidént baydén wezipe tapshuruwélip arqidinla teywen boghuzidin ötüshi xitaygha bérilgen küchlük bir signal iken.