Xitayning “Tallan'ghan tor cholpanliri” arqiliq Uyghur éli toghrisidiki saxta teshwiqatliri dawam qilmaqta

Xitay hökümitining uchur kontrolluqining bir muhim ipadisi Uyghur élige tekshürüshke yaki xizmetke baridighan chet ellik muxbirlarni qattiq teqib qilishta ipadiliniwatqanliqi melum. Shuning bilen birge xitay hökümitining tashqi dunyadiki kishilerning bu makan heqqidiki uchurgha bolghan teshnaliqini destek qilghan halda oxshimighan tor cholpanlirining aghzidin bu heqtiki “Ijabiy bayanlar” ni tökme qilishi héchqachan toxtap qalmighan.

Yéqinda teywenlik “Tor cholpanliri” ning ürümchi shehiridiki xususiy ziyaret xatirisi torlarda keng tarqilishqa bashlighan. Buningda ular gherb axbaratliri teswirlewatqan “Bir tereplime shinjang” heqqidiki bayanlarni özlirining körgenlirige birleshtürüp “Bu jayda tinchliq we asayishliq höküm sürmekte” dep xulase chiqarghan. Ular “Bu xildiki awat muhitta yashawatqan Uyghurlarning bextiyar hayatini körüp yürek tarilirim lerzige keldi” dep yazghan.

Halbuki, bu widiyolar “Kündilik xitay” torida hembehirlinip keng tarqalghandin kéyin tordashlar buninggha tushmu-tushtin tenqid pikirlirini yaghduruwetken. Beziler “Ejeba dangliq muxbirlar baralmighan yerlerge siler qandaq baralidinglar?” dégendek so'allarni qoyghan. Shundaqla ürümchige barghan bir qisim muxbirlarning parakendichilik, somka axturush, kaméra tekshürüsh, hetta qoghlap chiqirilishqa duch kelgenliki eskertilgen. Yene beziler, “Xitay peqet öz dumbiqini chalidighan kishilerningla ashu makan'gha bérishigha yol qoyidu. Undaqta, siler kim?” dep so'al qoyghan.

Xitay hökümitining bu xildiki teshwiqat urushi yéqinqi mezgillerde ewj élishqa bashlighan bolup, buning bir roshen ipadisi muhajirette siyasiy panahliq tilesh arqiliq puqraliqni alghan kishilerge “Xitay ziyariti üchün wiza béjirip bérish” te öz eksini tépiwatqanliqi melum.