Хитайда нәпәс йоллири кесәлликлириниң шиддәт билән көпийиши әндишә қозғимақта

Хитай миқясида тарқилишчан нәпәс йоллири кесәлликлириниң шиддәт билән көпийип кетиши әндишә қозғиған. Нәпәс йоли кесәлликлири болупму балиларда әң көп тарқиливатқан болуп, хитайниң һөкүмәт таратқулири өткән һәптидики хәвиридә бейҗиң, тийәнҗин вә башқа шималий өлкиләрдики дохтурханиларниң әң зор сиғимчанлиқ чекигә йәткәнликини хәвәр қилған.

“һәптилик хәвәр” журнилиниң дейишичә, хитайда нәпәс йоллири кесәлликлириниң бундақ әвҗ елип кетиши “ковид юқуми қайта ямраватамду” дегән әндишини пәйда қиливатқан болуп, һәр қайси дөләтләр бундақ бир еһтималлиққа тәйярлиқ көрмәктикән. Дуня сәһийә тәшкилати өзлириниң хитайдики вәзийәтни диққәт билән көзитиватқанлиқини билдүргән.

Хитай дөләтлик сәһийә комитети 26-ноябир күни елан қилған уқтурушида, нәпәс йоли юқумлиниш әһвалиниң ямришиға тарқилишчан зукам, нәпәс йоли бирикмиси вируси (RSV), адено вируси қатарлиқ көп хил кесәллик қозғиғучилар сәвәб болуватқанлиқини дегән.

Мәлум болушичә, нәпәс йоли кесәлликлири үрүмчидиму көрүлүватқан болуп, үрүмчи шәһәрлик юқумлуқ кесәлликләрдин мудапиәлиниш-кесәлликләрни тизгинләш мәркизи мәхсус уқтуруш елан қилип, аһалиләрни тарқилишчан нәпәс йоллири кесәлликлиригә сәвәб болуватқан қизил вирустин қоғдинишқа вә ваксина әмләшкә чақирған.

“тәйвән хәвәрлири” гезитиниң дейишичә, хитайда тарқиливатқан нәпәс йоллири кесәлликлиригә 7 хил кесәл қозғатқучи вирус сәвәб болуватқан болуп, чаған мәзгилидә юқум йәниму юқири пәллигә чиқиши мумкин икән.